Gündə 60 qram badam xroniki xəstəliklərin riskini azalda bilər

“Nature” jurnalında dərc olunan məqaləyə görə, gündə 60 qramdan çox badam qəbulu orqanizmdə oksidləşdirici stressi əhəmiyyətli dərəcədə azaldır və hüceyrələri, o cümlədən DNT-ni zədələnmədən qoruyur. Bu isə ürək-damar xəstəlikləri, şəkərli diabet, xərçəng və neyrodegenerativ pozuntular kimi xroniki xəstəliklərin qarşısının alınmasına kömək edir.

TodayPress TV xəbər verir ki, aparılan tədqiqatlar badamın tərkibində "E" vitamini, polifenollar və mono doymamış yağlar kimi güclü antioksidantların olduğunu göstərib.

Bu maddələr reaktiv oksigen növlərini (ROS) neytrallaşdıraraq hüceyrələrin zədələnməsinin qarşısını alır. Badamın müntəzəm istifadəsi orqanizmdə antioksidant aktivliyi artırır və "MDA", "8-OHdG" kimi hüceyrə zədələnmə göstəricilərini azaldır.

Alimlərin fikrincə, badamın təsiri doza və hazırlanma üsulundan asılıdır. Məsələn, qovurma prosesi polifenol miqdarını 26 faizədək azalda bilər ki, bu da çiy badamla müqayisədə onun antioksidant xüsusiyyətlərini zəiflədir.

Mütəxəssislər gündə təxminən 60 qram — iki iri ovuc — badam yeməyi tövsiyə edirlər. Onların qənaətinə görə, gündəlik rasiona badamın daxil edilməsi sağlamlığı qorumaq və xroniki xəstəliklərin profilaktikası üçün sadə və əlçatan üsullardan biridir.

Qiymət Mahir