Azərbaycan və Tacikistan tekstil sektorunda yeni sənəd imzaladı
Azərbaycan Tekstil Assosiasiyası ilə Tacikistanın Pambıq və Tekstil Assosiasiyası arasında əməkdaşlığa dair Anlaşma Memorandumu imzalanıb.
Bu barədə TodayPress TV-yə İxracın və İnvestisiyaların Təşviqi Agentliyindən (AZPROMO) məlumat verilib.
Anlaşma Memorandumu AZPROMO-nun nümayəndə heyətinin Tacikistana işgüzar səfər çərçivəsində ölkənin Sənaye və Yeni Texnologiyalar Nazirliyinin təşkilatçılığı ilə keçirilən I beynəlxalq tekstil və yüngül sənaye forumunda imzalanıb.
Sənəddə tekstil sənayesinin, o cümlədən dayanıqlı kənd təsərrüfatı, ipəkçilik və ticarətin birgə inkişaf etdirilməsi üzrə birgə fəaliyyət nəzərdə tutulur.
Səfər çərçivəsində beynəlxalq tekstil və yüngül sənaye forumunda və bir sıra görüşlərdə iştirak olunub.
Bildirilib ki, 50-dən çox ölkədən iştirakçı toplayan forumunun nazirlər panelində çıxış edən Beynəlxalq Tekstil İstehsalçıları Federasiyasının (ITMF) baş direktoru Kristian Şindler, Tacikistanın sənaye və yeni texnologiyalar naziri Şerali Kəbir, Qırğızıstanın iqtisadiyyat və ticarət nazirinin müavini Sanjarbek Bolotov, AZPROMO-nun icraçı direktoru Yusif Abdullayev, İsveçrə Tekstil Qurğuları Assosiasiyasının prezidenti Davide Makabruni və tekstil sahəsi üzrə ixtisaslaşmış beynəlxalq şirkətlərin nümayəndələri tekstil sənayesinin qlobal inkişaf perspektivləri haqqında danışıblar. Paneldə Azərbaycan və Tacikistan arasında tekstil sahəsində əlaqələrin gücləndirilməsi imkanları dəyərləndirilib, eləcə də sənaye sektorunda iki ölkə arasında yol xəritəsinin hazırlanması məsələsi qeyd edilib.
Səfər zamanı Tacikistanın Sənaye və Yeni Texnologiyalar Nazirliyində nazir müavini Əziz Nəzər və ölkənin Pambıq və Tekstil Assosiasiyasının sədri Umed Şomurodovla ilə görüş keçirilib. Görüşdə iki ölkə arasında sənaye əməkdaşlığının mövcud vəziyyəti və gələcək inkişaf istiqamətləri müzakirə olunub.
ITMF-in baş direktoru Kristian Şindler və İsveçrənin Tekstil Qurğuları Assosiasiyasının prezidenti David Makkabruni ilə baş tutan görüşdə tərəflər Azərbaycanın ITMF-ə potensial üzvlüyünün açacağı imkanlar, istehsal sahəsində qabaqcıl texnologiyaların tətbiqi və regional tərəfdaşlıq barədə fikir mübadiləsi aparıblar. Bundan əlavə, gələcək tədbirlərin ölkəmizdə keçirilməsi məqsədilə ITMF nümayəndələri Bakıya dəvət olunub.
