Rob Marşall: “Maklaren” rəqiblərin yeniliklərini analiz edir

“Maklaren” komandasının texniki direktoru Rob Marşall “Formula-1” komandalarının rəqiblərinin texniki yeniliklərini niyə diqqətlə öyrəndiyini açıqlayıb.

TodayPress TV xəbər verir ki, bu barədə “Racingnews365” portal məlumat yayıb. 

Marşall başqa komandaların həllərindən ilham almağın bu idman növünün ayrılmaz hissəsi olduğunu deyib.

“Biz tamamilə hər şeyə baxırıq. Bəzi həllər reqlamentə nəzər salan kimi sıradan çıxır. Digərləri isə mümkün görünür. Bəzi variantlar maşının arxitekturası, etdiyiniz dəyişikliklər və ya mühərrikin quruluşu ilə məhdudlaşır. Amma sonda biz hər şeyi analiz edirik.

Bəzi ideyalar aerodinamik tuneldə və ya CFD modelləşdirməsində test mərhələsinə çatır. Digərləri isə sadəcə düşüncə eksperimenti kimi qalır ki, bunun bizə kömək edib-etməyəcəyini anlayaq. 

Əsas məsələ odur ki, biz start düzlüyündəki demək olar bütün rəqiblərin nə etdiyinə baxırıq və bunun bizim maşında işləyib-işləməyəcəyini anlamağa çalışırıq.

Çox yayılmış bir fikir var ki, kopyalamağın mənası yoxdur - yəni bir maşında işləyən həll digər maşında işləməz. Amma bu, həmişə belə deyil. İkili diffuzor bir maşında işlədi, sonra isə hamı onu kopyaladı. Deməli, kopyalamaq “Formula-1”in bir hissəsidir.

Bir şey başqasının həllini kopyalamaqdır. Tamamilə başqa məsələ isə onun nə etdiyini və hansı məqsədə xidmət etdiyini anlamaqdır. Əsl ustalıq da bundadır”, – deyə Marşall bildirib.

Namiq HUN

TodayPress TV