Kiyevə hücum: Uşaq yaralandı, infrastrukturlar zədələndi - GÖRÜNTÜLƏR
Ukraynanın şimalında yerləşən Kiyev vilayətinə 17 sentyabrda baş verən Rusiya hücumunun nəticələri sənədləşdirilir.
TodayPress TV xəbər verir ki, polis bölgənin bir neçə rayonunda yaşayış evlərinə və mülki infrastruktura ziyan dəydiyini açıqlayıb.
Məlumata görə, Brovarı, Fastiv, Borispol və Buça rayonlarında dağıntılar qeydə alınıb.
Ən böyük ziyan Brovarı rayonunda baş verib. Burada istehsal, anbar və ofis binaları, yardımçı tikililər, bir yük maşını və üç fərdi ev zədələnib.
Fastiv rayonunda iki minik avtomobili, Borispol rayonunda isə heyvan sığınacağının binası zərər görüb.
Buça rayonunda hücum nəticəsində 7 yaşlı qız yaralanıb. Ona ilkin tibbi yardım hadisə yerində göstərilib. Bundan başqa, üç fərdi ev və bir avtomobilə də ziyan dəyib.
Polisin məlumatına görə, istintaq qrupları hadisə yerlərində işləyir və dəymiş ziyanın həcmini müəyyənləşdirir. Toplanan materialların Ukrayna Cinayət Məcəlləsinin müharibə qanunlarının və adətlərinin pozulmasına dair 438-ci maddəsi üzrə cinayət işinə əlavə ediləcəyi bildirilib.
17 sentyabrda Ukraynanın digər bölgələrində də hücumlar qeydə alınıb. Jitomir vilayətində sənaye parkına zərbə nəticəsində bir nəfərin öldüyü və bir neçə nəfərin yaralandığı bildirilib. Zaporojyedə təcili yardım maşınına hücum zamanı iki nəfərin, avtobusa zərbə nəticəsində isə səkkiz nəfərin yaralandığı açıqlanıb.
Dnepropetrovsk vilayətində isə həmin gün 40-dan çox hücumun baş verdiyi, nəticədə üç nəfərin öldüyü və beş nəfərin yaralandığı bildirilib.
Türkan İsgəndərli
