Gələcəyin peşələri dəyişir: Gənclər ən çox hansı ixtisaslara üz tutur?
Avqustun 13-19-da ali təhsil müəssisələrinə ixtisas seçimi aparılacaq. İxtisas seçimi ərəfəsində abituriyentləri ən çox maraqlandıran məsələlərdən biri də hansı ixtisaslara tələbatın daha yüksək olmasıdır.
Təhsil eksperti Ramin Nurəliyev TodayPress TV-yə açıqlamasında bildirib ki, abituriyentlərin maraq göstərdiyi ixtisaslar ixtisas qruplarına görə fərqlənir və seçimlər əsasən toplanan bala uyğun formalaşır.
Onun sözlərinə görə, I ixtisas qrupunda ən böyük maraq kompüter yönümlü ixtisaslaradır:
"Bu gün artıq gələcəyin süni intellekt üzərində qurulacağını hər kəs görür. Məhz buna görə də gənclər kompüter yönümlü ixtisaslara daha çox üstünlük verirlər. Riyaziyyat-kimya altqrupunda isə qida mühəndisliyi, neft-kimya, kimya mühəndisliyi, eləcə də nəqliyyatda logistika kimi ixtisaslar abituriyentlərin maraq dairəsindədir. Burada seçimlər əsasən keçid balına uyğun tənzimlənir. Yüksək bal toplayanlar daha çox kimya mühəndisliyi və neft-qaz mühəndisliyini seçirlər. Nisbətən aşağı bal toplayanlar isə qida sektoru və nəqliyyatda logistika istiqamətlərinə üstünlük verirlər".
Ekspert əlavə edib ki, II ixtisas qrupunda maliyyə və iqtisadiyyat istiqamətləri ən çox seçilən sahələr sırasında yer alır:
"Bu qrupda əsas maraq maliyyə, iqtisadiyyat, beynəlxalq ticarət və logistika ixtisaslarınadır. Bəzi hallarda dövlət sifarişi əsasında turizm ixtisasını seçənlər də olur. Bu daha çox orta bal toplayan abituriyentlər arasında müşahidə edilir. Yüksək bal toplayanlar isə əsasən tədrisi ingilis dilində aparılan maliyyə, iqtisadiyyat, beynəlxalq ticarət və logistika proqramlarına üstünlük verirlər".
O, III ixtisas qrupunda hüquq ixtisasının yenə də ən prestijli seçimlərdən biri olduğunu vurğulayıb:
"III ixtisas qrupunda hüquq, dövlət və ictimai münasibətlər, beynəlxalq münasibətlər, həmçinin pedaqoji istiqamətlərdən ingilis dili müəllimliyi daha çox seçilir. Xüsusilə hüquq ixtisası yüksək bal toplayan abituriyentlərin əsas seçimidir. Orta bal toplayanlar isə pedaqoji ixtisaslarla yanaşı, sosial iş ixtisasına da maraq göstərirlər. IV ixtisas qrupunda isə liderliyi ənənəvi olaraq tibb istiqaməti qoruyur. Bu qrupda birinci yerdə Tibb Universitetinin ixtisasları gəlir. Tibb, stomatologiya və digər tibb istiqamətləri ən çox seçilən sahələrdir. Bundan sonra psixologiya və biotexnologiya ixtisasları gəlir. Xüsusilə biotexnologiya son illər gənclərin maraq göstərdiyi perspektivli sahələrdən birinə çevrilib".
Ramin Nurəliyev V ixtisas qrupunda isə daha çox İdman Akademiyası və dizayn ixtisaslarının seçildiyini bildirib. Bununla belə, o hesab edir ki, süni intellektin sürətli inkişafı gələcəkdə dizayn sahəsinə olan tələbatı azalda bilər:
"V qrup abituriyentləri arasında İdman Akademiyasına maraq kifayət qədər yüksəkdir. Bununla yanaşı, dizayn ixtisası da geniş seçilir. Ancaq hesab edirəm ki, gələcəkdə dizayn əvvəlki qədər tələbatlı olmayacaq. Süni intellekt artıq bu sahədə ciddi imkanlar yaradır. Bu gün müxtəlif süni intellekt platformaları, o cümlədən ChatGPT vasitəsilə bir binanın və ya evin şəklini yükləyib qısa zamanda fərqli dizayn layihələri əldə etmək mümkündür. Bu texnologiyalar inkişaf etdikcə dizayn sahəsində çalışan mütəxəssislərə olan ehtiyac müəyyən qədər azala bilər".
Ekspert hesab edir ki, builki ixtisas seçimində də ən böyük rəqabət kompüter yönümlü ixtisaslar, hüquq, maliyyə və tibb istiqamətlərində müşahidə olunacaq.
Türkan İsgəndərli
FOTOLAR
