“Planetlərin kiçik paradı”ı olacaq

Perm Milli Tədqiqat Politexnik Universitetinin məlumatına görə, aprelin 18-də səhər səmasında dörd planet eyni xətt üzrə düzüləcək.

TodayPress TV xəbər verir ki, aprelin 18-də Yer sakinləri nadir astronomik hadisənin şahidi olacaqlar.

Səhər səmasında dörd planet bir xətt üzrə düzüləcək. Saturn, Mars, Merkuri və Neptun səmanın dar bir sektorunda görünərək “parad” effekti yaradacaq. Bu barədə universitetin mətbuat xidməti Gazeta.ru-ya məlumat verib. 

Perm Politexnik Universitetinin astronomiya üzrə mütəxəssisi Yevgeni Burmistrovun sözlərinə görə, bu düzülüş planetlərin Günəş ətrafında təxminən eyni müstəvidə — ekliptika boyunca hərəkət etməsi ilə bağlıdır.

“O izah edib ki, bir neçə səma cismi bu xəttin kiçik bir hissəsində yerləşdikdə, onlar sanki bir sırada düzülmüş kimi görünür, halbuki əslində aralarında milyonlarla kilometr məsafə var.”

Apreldə baş verəcək bu hadisə dörd planetin iştirak etdiyi “kiçik parad”lardan biridir. Onlardan üçü — Mars, Saturn və Merkuri — adi gözlə görünəcək, Neptunu isə zəif işıqlanmasına görə yalnız teleskopla müşahidə etmək mümkün olacaq.

Planetlər şərq üfüqündə, sübh tezdən, üfüqə yaxın yerləşəcək. Müşahidə üçün ən əlverişli vaxt Günəşin doğuşundan təxminən yarım saat əvvəldir. Bu fenomen təkcə aprelin 18-də deyil, həmin tarixə yaxın bir neçə gün ərzində də müşahidə oluna bilər.

Alimin sözlərinə görə, planetlərin ən yaxın yerləşməsi aprelin 20-də baş verəcək. Bu zaman bəzi planetlər arasındakı məsafə dərəcənin kiçik hissələrinə qədər azalacaq və onlar demək olar ki, bir xətt üzrə düzülmüş kimi görünəcək.

Müşahidə müəyyən səbir tələb edir: səma cisimləri üfüqə çox yaxın yerləşdiyindən və səhər işığına görə onları görmək çətin ola bilər. Lakin Ayın olmaması — yeni ayın aprelin 17-də baş verməsi — müşahidə şəraitini yaxşılaşdıracaq.

Ekspert qeyd edib ki, tarixi miflərə baxmayaraq, bu cür hadisələrin Yerə heç bir təsiri yoxdur. “Qədim dövrlərdə planetlərin düzülüşü əlamət kimi qəbul olunurdu, lakin bu gün onların cazibə təsirinin əhəmiyyətsiz olduğunu bilirik”, — deyə Burmistrov vurğulayıb.

Buna baxmayaraq, bu cür hadisələr elm üçün əhəmiyyətlidir: onlar planetlərin hərəkət modellərinin təkmilləşdirilməsinə kömək edir və kosmik missiyaların planlaşdırılmasında istifadə olunur.

Jalə Rövşən 

TodayPress TV