Minlərlə sirli mavi canlı çimərliyə çıxdı

ABŞ-də minlərlə yelkənli dəniz canlısı sahilə çıxıb.

TodayPress TV xəbər verir ki, ABŞ-nin San-Fransisko sahillərinə minlərlə mavi, meduzaya bənzər canlı çıxıb.

Çimərliyə gələnlər sahildə bu sirli canlıları müşahidə ediblər. Mütəxəssislərin fikrincə, güclü küləklər yelkənli dəniz canlılarını — velellaları sahilə çıxarıb.

Velella meduzalar və poliplərlə yaxın qohum olan koloniya halında yaşayan dəniz canlısıdır. Dibdə yaşayan əksər poliplərdən fərqli olaraq, velella suyun səthində üçbucaqlı, mavi-bənövşəyi “yelkən” vasitəsilə hərəkət edir. O, planktonla qidalanır və suda asılı qalan çadırları ilə qidasını tutur. Çoxalma zamanı isə kiçik meduzalar əmələ gətirir ki, bunlar sonradan yeni yelkənli canlılara çevrilir.

Qeyd edək ki, Velella zahirən ölümcül “Portuqaliya döyüşçüsü”nə bənzəsə də, onun zəhəri insanlar üçün demək olar ki, zərərsizdir. Bu canlıların kütləvi şəkildə sahilə çıxmasına “mavi gelgit” deyilir.

Jalə Rövşən 

TodayPress TV