KİV: İran münaqişəsi Avropanı seçim qarşısında qoydu
ABŞ və İran arasında baş verən qarşıdurma Avropada uzun illərdir davam edən müdafiə xərcləri çatışmazlığını daha da qabardaraq liderləri hərbi büdcə ilə sosial xərclər arasında seçim etməyə məcbur edir.
TodayPress TV xəbər verir ki, bu barədə “The New York Times” qəzetinin analitikləri məlumat yayıblar.
Məlumata görə, nəşr Avropanın “silah yoxsa rifah” seçimi ilə üz-üzə qaldığını qeyd edir və bildirir ki, İranla münaqişə bu problemi daha da dərinləşdirib. Bu yanaşma dövlətlərin büdcə planlaşdırmasında müdafiə xərcləri ilə vətəndaşlara yönəlik sosial öhdəliklər arasında balans yaratmasını tələb edir. Əksər hallarda hərbi xərclərin artırılması səhiyyə, təhsil və infrastruktur kimi sahələrdə ixtisarlarla nəticələnir.
Analitiklər qeyd edib ki, Avropa uzun illər ABŞ-nin təhlükəsizlik təminatından faydalanaraq sosial təminata daha çox investisiya edib. Lakin ABŞ Prezidenti Donald Tramp hakimiyyətə gəldikdən sonra bu balans dəyişib və o, Avropa ölkələrini öz müdafiələrini müstəqil şəkildə təmin etməyə çağırıb.
Nəşr vurğulayıb ki, Avropa ölkələrinin əksəriyyəti ABŞ-dən hərbi asılılığı azaltmaq üçün müdafiə xərclərini artırmalı olduqlarını anlayır. Bununla belə, bu keçid həm maliyyə, həm də siyasi baxımdan ağrılı ola bilər. Bildirilib ki, müdafiəni gücləndirmək üçün vergilərin artırılması və sosial xərclərin azaldılması ictimai narazılığa səbəb ola və mövcud siyasi liderlər üçün risk yarada bilər.
Eyni zamanda, İranla bağlı gərginlik və Hörmüz boğazının bağlanması fonunda yanacaq qiymətlərinin artması vəziyyəti daha da ağırlaşdırır və Avropa əhalisi artıq benzin vergilərinin ləğvini tələb etməyə başlayıb.
Aysel Mətləb
