Husilərin Səudiyyəyə hücumuna Pakistandan SƏRT REAKSİYA
Pakistanın Baş naziri Şahbaz Şərif Səudiyyə Ərəbistanına husilər tərəfindən həyata keçirilən hücumu pisləyib.
TodayPress TV xəbər verir ki, Şərif “X” sosial şəbəkəsində paylaşımında husilərin Səudiyyə Ərəbistanında mülki və enerji obyektlərini hədəf alan hücumunu “qorxaqcasına hücum” adlandırıb. Onun sözlərinə görə, hücum nəticəsində çox sayda insan xəsarət alıb.
Pakistan Baş naziri Səudiyyə Ərəbistanı Kralı Salman bin Əbdüləziz Al Səud, vəliəhd Məhəmməd bin Salman və Səudiyyə xalqı ilə həmrəy olduqlarını bildirib.
“Bu cür iyrənc hücumlar günahsız insanların həyatını, eləcə də regional sülh və təhlükəsizliyi təhdid edir. Biz krallığın suverenliyinə, təhlükəsizliyinə və ərazi bütövlüyünə dəyişməz dəstəyimizi bir daha təsdiqləyirik”, – Şərif qeyd edib.
O, həmçinin hücum nəticəsində yaralananların tezliklə sağalması üçün dua etdiklərini bildirib.
Qeyd edək ki, Pakistan Səudiyyə Ərəbistanı ilə Məkkə müdafiə alyansı çərçivəsində müəyyən öhdəliklərə malikdir.
Kübra Musayeva
