100 il əvvəl gələcəyi belə təsəvvür edirdilər

1926-cı ildə insanlar gələcəyi necə təsəvvür edirdilər? Bir əsr əvvəl dərc olunan iki məqalə həmin dövrün texnologiya və sərvət anlayışına maraqlı baxış təqdim edir.

TodayPress TV xəbər verir ki, mətbuatda 1926-cı ilin sentyabrında “uçan ofislər” haqqında yazılar dərc olunub. Söhbət təyyarələrin ofis kimi istifadə edilməsindən gedirdi. Londonda bir milyonerin iki böyük təyyarə icarəyə götürərək onları iş masaları, qovluqlar, yazı maşınları və digər ofis avadanlıqları ilə təchiz etdiyi bildirilirdi.

Bu təyyarələrdən şəhərlər arasında səfər edən maliyyəçilər və tacirlər üçün istifadə olunması planlaşdırılırdı. Sərnişinlər uçuş zamanı simsiz teleqraf vasitəsilə birjalardan məlumat ala, eyni zamanda alış və satış əmrlərini diktə edə bilərdilər.

Beləliklə, 1926-cı ilin təsəvvüründə təyyarə sadəcə nəqliyyat vasitəsi deyil, həm də səfər zamanı işləməyə imkan verən mobil ofisə çevrilirdi.

Həmin dövrdə dərc olunan digər məqalə isə dəniz və okeanlarda olan qızıl və gümüş ehtiyatlarına həsr edilmişdi.

“Lumea” qəzetinin apardığı hesablamalara görə, dəniz suyunun tərkibində müəyyən miqdarda qızıl və gümüş mövcud idi. Məqalədə hər kubmetr dəniz suyunda orta hesabla 10 milliqram gümüş, hər ton suda isə təxminən 50 milliqram qızıl olduğu qeyd edilirdi.

Qəzet həmin dövrün dünya əhalisini təxminən 1,5 milyard nəfər hesablayaraq, dəniz suyundan bu qiymətli metalları çıxarmağın nəzəri baxımdan böyük sərvət yaradacağını yazırdı.

Lakin məqalədə əsas problem də göstərilirdi: qızıl və gümüşün dəniz suyundan çıxarılmasının maya dəyəri əldə edilən metalın qiymətindən daha yüksək ola bilərdi.

Bir əsr əvvəl yayımlanan bu iki yazı 1926-cı il insanlarının gələcəyi necə təsəvvür etdiyini göstərir. Bir tərəfdən əsas məqsəd səyahət vaxtını belə işə sərf etməklə sürəti artırmaq, digər tərəfdən isə təbiətdə mövcud olduğu bilinən, lakin əldə edilməsi çətin olan resurslardan istifadə etmək idi.

Bu baxımdan, 1926-cı ilin “uçan ofisləri” bu gün uzaqdan işləmək və mobil texnologiyalar dövründə maraqlı bir gələcək proqnozu kimi görünür. Dəniz suyundan qızıl çıxarılması ideyası isə hələ də texnologiyanın iqtisadi səmərəliliklə məhdudlaşdığını xatırladır.

Kübra Musayeva