Vaşinqtondan ANONS: İranı TƏRK EDİN! – Gizli ssenari işə düşür?

ABŞ hökuməti İranda olan öz vətəndaşlarını ölkəni dərhal tərk etməyə çağırıb və dövlət yardımına arxalanmamağı tövsiyə edib.   

Rəsmi xəbərdarlıqda təhlükəsizlik risklərinin artdığı, ölkədə iğtişaşların intensivləşdiyi, rabitə məhdudiyyətləri və nəqliyyat sistemində qeyri-sabit vəziyyətin hökm sürdüyü vurğulanır. 

ABŞ-nin İrandakı Virtual Səfirliyi vətəndaşlara evakuasiya planlarını müstəqil şəkildə hazırlamağı tövsiyə edib və hökumətin yalnız məhdud dəstək göstərə biləcəyini açıqlayıb. 

Bəs ABŞ-nin təcili çağırışı nəyin anonsudur?

Məsələ ilə bağlı TodayPress TV-yə danışan politoloq Fəqani Məhərrəmli bildirib ki, İran ətrafında baş verən prosesləri Yaxın Şərqdə cərəyan edən hadisələrdən ayrı düşünmək mümkün deyil:

“İran dövləti uzun illər dini, daha doğrusu dini təriqəti siyasətə və qonşu dövlətlərlə münasibətlərdə alət etmək yolu tutub. Təbii ki, bu da bumeranq effekti ilə özünə qarşı yönəlib. Artıq İran ətrafında həlqə tamamilə daralmaq və qapanmaq üzrədir”.

Politoloqun sözlərinə görə, ölkə daxilində də məhz yanlış siyasət səbəbindən etirazlar geniş vüsət almaqdadır:

“Hər nə qədər bu etirazlar zor gücü ilə yatırdılsa da, onların hər an yenidən genişlənmə ehtimalı yüksəkdir. Bu da onu göstərir ki, İran rejimi həm daxildə, həm də beynəlxalq sferada ciddi etibar itirib”.

F.Məhərrəmli qeyd edib ki, son günlər bu etibar itkisi İran hakimiyyətində ciddi çaşqınlıqla müşayiət olunur:

“ABŞ ilə gərginləşən münasibətlər fonunda İranın xarici işlər naziri əvvəlcə Türkiyəyə səfər edərək danışıqların İstanbulda keçiriləcəyinə dair mesaj verdi. Lakin bir-iki gün sonra mövqe dəyişdirildi və görüşün Omanın paytaxtı Maskatda keçiriləcəyi açıqlandı. Bu fakt İranın dini-siyasi və hərbi elitasında ciddi fikir ayrılıqları və dərin etimadsızlıq mühitinin mövcud olduğunu göstərir”.

Ekspertin fikrincə, Maskatda keçirilən ABŞ–İran danışıqları iki ssenari ilə nəticələnə bilər:

“Ya İran ABŞ-nin bütün şərtlərini qəbul edərək ölkənin neft və qaz resurslarının idarə olunmasını amerikalılara təslim edəcək, ya da ABŞ hava qüvvələrinin hədəfinə çevriləcək. ABŞ-nin son anda vətəndaşlarını İranı təcili şəkildə tərk etməyə çağırması tərəflərin danışıqlar masasından ciddi nəticə gözləmədiklərinin əyani sübutu sayıla bilər”.

F.Məhərrəmlinin qənaətincə, İran ətrafında proseslər yeni başlayır:

“Yaxın zaman kəsiyində İran səhnəsində yeni və daha ciddi hadisələrin şahidi olacağımız qaçılmazdır”.

Qiymət Mahir

TodayPress TV