Türkiyə HƏRƏKƏTƏ KEÇDİ: Naxçıvandan DÜNYAYA MESAJ

Martın 11-də Türkiyə Silahlı Qüvvələrinin Quru Qoşunları komandanı ordu generalı Metin Tokelin rəhbərlik etdiyi nümayəndə heyəti Naxçıvana səfər edib. 

Ordu generalı Metin Tokel bölgədə sabitliyin gücləndirilməsi və təhlükəsizliyin tam təmin edilməsi məqsədilə Türkiyənin daim Azərbaycanın yanında olduğunu və tarixi Şuşa Bəyannaməsinin müddəalarına uyğun olaraq istənilən hərbi yardımı göstərməyə hazır olduqlarını bildirib.

Politoloq Natiq Miri bu barədə TodayPress TV-yə danışarkən bildirib ki, Türkiyənin ordu generalının Naxçıvana səfəri qardaş Azərbaycana dəstək mesajıdır: 

"İlk növbədə bu, Türkiyənin Azərbaycanın yanında olduğunu bir daha göstərmək məqsədi daşıyır. Digər tərəfdən, əgər Azərbaycana qarşı hər hansı bir düşmənçilik planları varsa, Türkiyəni qarşısında görəcəkləri mesajı da verilir". 

Ekspert qeyd edib ki, Naxçıvana dronlarla hücum edən qüvvələrə də mesaj ünvanlanıb: 

"Burada konkret bir ölkə nəzərdə tutulmur, çünki İran, ABŞ və İsrail arasındakı qarşıdurmada hər bir ölkənin öz maraqları var. ABŞ, İsrail, İran, həmçinin İranın müttəfiqi sayılan Rusiya və Çin və bu vəziyyətdən sui-istifadə etmək istəyən Avropa Birliyinin aparıcı ölkələrinin maraqları bir-birindən fərqlidir". 

N.Miri hadisələrin  qeyri-müəyyənlik və xaos içində olduğunu diqqətə çatdırıb:

"İndiki vəziyyətdə dronların hansı istiqamətdən gəldiyini müəyyənləşdirmək çətindir, çünki İranda idarəolunmaz bir xaos yaşanır. Zirzəmilərdə prosesi idarə etdiklərini göstərmək görüntüsü yaratmaq bu xaosu təkzib etmir. Bundan başqa, İran prezidenti səviyyəsində Türkiyə və Azərbaycana atılan raket və dronların təkzib olunması faktı da göstərir ki, İranda böyük bir xaos və idarəetmədə ciddi anlaşılmazlıq mövcuddur". 

Politoloq, həmçinin əlavə edib ki, bu baxımdan, verilən mesajlar həm Naxçıvana dron atanlara, həm də Azərbaycanı bu vəziyyətə cəlb etməyə çalışan qüvvələrə yönəlib. 

“Bu, həmçinin İrandakı mövcud rejim və onun daxilindəki potensial xarici təsirləri – məsələn, İsrail casuslarını – əhatə edə bilər. Yekun olaraq, mesaj birlik mesajıdır. Həm Türkiyəyə, həm də Azərbaycana atılan raket və dronlar fonunda mesajın mahiyyəti eynidir: nə Türkiyə, nə də Azərbaycan bu gərginliyə qatılmaq istəmir. Onlar oyuna getməyərək, idarə olunan prosesin tərkib hissəsi olmaq istəmirlər”. 

Ekspert sonda xüsusilə vurğulayıb ki, Türkiyəyə atılan raketlər zamanı Azərbaycan açıq şəkildə “qardaş Türkiyənin yanındayıq” mesajı verdi. General Tokelin nümayəndə heyəti ilə Naxçıvana səfəri isə eyni mesajı təkrarlayır: “Qardaşımız Azərbaycanın yanındayıq”, “Azərbaycan və Naxçıvan tək deyil”. Mesaj artıq ünvanına çatıb. 

Qeyd edək ki, martın 5-də İran istiqamətindən Naxçıvana dron hücumu həyata keçirilib. Nəticədə 4 mülki şəxs xəsarət alıb.  

Jalə Rövşən

TodayPress TV