Rusiyanın nüvə strategiyası: Norveç üçün real risk varmı?

Norveçin müdafiə rəisi general Eirik Kristoffersen Rusiyanın nüvə arsenalının böyük bir hissəsinin, o cümlədən nüvə sualtı qayıqlarının, quru raketlərinin və nüvə silahına malik təyyarələrinin Norveç sərhədindən qısa bir məsafədə yerləşən Kola yarımadasında yerləşdiyini bildirib.

General Oslonun Rusiyanın ölkəyə gələcəkdə hücumu ehtimalını istisna edə bilməyəcəyini qeyd edib və Moskvanın şimalda yerləşən nüvə aktivlərini qorumaq üçün Norveçdən istifadə edə biləcəyi fikrini irəli sürüb.

Maraqlıdır, həqiqətən də Rusiyanın öz nüvə ehtiyatını qorumaq məqsədilə Norveçə hücum etmə ehtimalı var?

Mövzu ilə bağlı politoloq Elçin Xalidbəyli TodayPress TV-yə danışarkən bildirib ki, Avropa ölkələri Rusiyanı real hərbi təhlükə kimi görür və xüsusilə nüvə zərbəsi ehtimalını istisna etmirlər.

“Son vaxtlar ümumilikdə Avropa ölkələri Rusiya təhlükəsindən ciddi şəkildə ehtiyat edirlər. Avropa Birliyi bu riski nəzərə alaraq quruma üzv ölkələrin hərbi sənaye komplekslərinin inkişafı, eləcə də müdafiə imkanlarının və ordularının gücləndirilməsi üçün külli miqdarda maliyyə vəsaiti ayırıb”, - deyə analitik izah edib.

Siyasi şərhçi vurğulayıb ki, dövlətlərarası məsləhətləşmələrlə paralel olaraq artıq konkret addımların atılmasına başlanılıb. Onun sözlərinə görə, hazırda Avropa ölkələri yaxın gələcəkdə Rusiyadan hərbi təhlükə gözləyirlər və bu təhlükənin nüvə savaşı xarakteri daşıya biləcəyini də qətiyyən istisna etmirlər.

E. Xalidbəyli qeyd edib ki, belə dövlətlər sırasında Norveç də var:

“Norveç Rusiya üçün daha əlçatan coğrafiyada yerləşdiyindən ehtiyat addımlar atması zəruridir və bu, istisna hal deyil. Ukrayna müharibəsi ətrafında yaranmış son vəziyyətdə Rusiyanın mövqelərinin nisbətən güclənməsi Norveçdə və ümumilikdə Avropada ciddi narahatlıq doğurur. Norveçlə yanaşı Şərqi Avropa və Baltikyanı ölkələr də özlərini Rusiyanın əsas hədəfləri sırasında görür və bu səbəbdən müdafiə xarakterli addımlarda daha aktiv mövqe tutmağa çalışırlar”.

Politoloq sonda qeyd edib ki, bütün bu proseslər Rusiyanın qlobal məkanda real təhlükə mənbəyinə çevrildiyini göstərir. Ekspertin fikrincə, hazırda Rusiya ilə əməkdaşlıqdan daha çox, Rusiyadan müdafiə olunmaq ehtiyacı ön plana çıxıb və Avropa ölkələrinin mütləq əksəriyyəti, o cümlədən Norveç, xüsusilə nüvə zərbəsi riskinə qarşı preventiv tədbirlər görmək məcburiyyətində qalıb.

Aysel Mətləb

TodayPress TV