Pekindən Rusiyaya dəstək, yoxsa TƏLƏ? – SON 4 İLDƏ İLK

KİV-də yayımlanan məlumatlara görə, Çin Belarusda Rusiya üçün sursat fabriki inşa edir. Bununla da Pekin son 4 ildə ilk dəfə Rusiyaya bu cür açıq dəstək vermiş olur.  

Sözügedən məsələni politoloq Natiq Miri TodayPress TV-yə şərh edib.

O, qeyd edib ki, iddialar həqiqəti əks etdirirsə, geosiyasi gərginlik fonunda bu sadəcə Rusiya və Belarusa dəstək deyil, eyni zamanda Avropaya hərbi təhdid yaradır: 

“Bu həm də çox ciddi bir mesajdır. Çünki iqtisadi, ticarət, tarif müharibələrinin getdiyi bir zamanda, xüsusilə də bu məsələni tətikləyən ABŞ-nin təhdidedici qərarları fonunda Çin Avropa Birliyi ilə daha da yaxınlaşma siyasətini yürüdür. Bu kontekstdə Böyük Britaniya, Fransa, Almaniya kimi aparıcı dövlətlərin, Avropa dövlətlərinin rəhbərlərinin son Çin səfərlərini düşünün”.

Analitik vurğulayıb ki, bu məlumat böyük bir nonsens yaradır: 

"Adətən Çin bu cür təhlükəli addımlar, birtərəfli qaydada təhlükəli addımlar atmır. Çünki belə bir vəziyyət Avropa Birliyini Çinə qarşı yönəldəcək bir addımdır. Və indiki vəziyyətdə Çin rəhbərliyi heç vəchlə istəməz ki, AB kimi qlobal iqtisadi gücü özünə qarşı qoysun. Çünki Avropa Çin üçün çox böyük bazardır".

Ekspertin fikrincə, indiki vəziyyətdə Avropa Birliyi ilə Amerika arasında parçalanmanı və fikir ayrılıqlarını daha da böyütmək, bu iki gücü bir-birindən ayırmaq və Avropa bazarında daha çox iştirak etmək üçün Çin AB ilə münasibətləri strateji tərəfdaşlığa yönəlik şəkildə inkişaf etdirməkdə maraqlıdır.

"Ona görə də bu məlumatı doğru saymıram. Bu baxımdan da bu informasiyadan irəli gələn konkret uzağa gedən nəticələr də çıxartmaq istəmirəm. Çünki dünyada bu gün yalançı məlumatlar, dezinformasiyalar ayaq tutub yeriyir. Sadəcə ayaq tutmur, yeriyir. Və bu kontekstdə maraqlı olan müxtəlif geosiyasi güclər var və o güclərin başında da Rusiya kimi yalan institutları olan bir dövlət dayanır".

N.Miri yekun olaraq əlavə edib ki, bu məlumat  düşünülmüş və qlobal güclər arasında münasibətləri pozacaq bir dezinformasiyadır.

Jalə Rövşən

TodayPress TV