İranın "KİÇİK QARDAŞI" niyə susur?

"Ermənistan hansısa prosesə ciddi reaksiya verə biləcək səviyyədə olan ölkə deyil". 

Bunu TodayPress TV-yə politoloq Elçin Xalidbəyli deyib.  

O qeyd edib ki, Ermənistanın İran-ABŞ-İsrail gərginliyinə də hər hansı təsir göstərmək və ya real reaksiya vermək imkanları məhduddur.

Analitik diqqətə çatdırıb ki, Ermənistanın hazırkı əsas “reaksiyası” Qərbə yaxınlaşmaq və inteqrasiya olunmaq cəhdidir:  

"Bunun yolu Azərbaycan və Türkiyə ilə münasibətlərin normallaşdırılmasından keçir. "Tramp marşrutunun" reallaşması faktiki olaraq Ermənistanın həm Yaxın Şərqdə, həm İran ətrafında, həm də Cənubi Qafqazda baş verən və ya baş verə biləcək hadisələrə dolayısı reaksiyası kimi qiymətləndirilə bilər. Çünki bu halda ABŞ-nin regionda mövcudluğu artmış olacaq. Bu isə həm İran, həm də Rusiya üçün problem yarada bilər və "Tramp marşrutunun" həyata keçirilməsi Cənubi Qafqazı tamamilə yeni mərhələyə daşıya bilər". 

E. Xalidbəyli əlavə edib ki, ümumilikdə isə Ermənistanın hazırkı mövcudluq və inkişaf layihəsi məhz "Tramp marşrutu" (TRIPP) ilə bağlı görünür. Buna görə də Ermənistanın nə indi, nə də yaxın perspektivdə qlobal proseslərə ciddi təsir göstərmək və ya real reaksiya vermək imkanları realdır. 

Jalə Rövşən

TodayPress TV