İranın hücumlarının arxasında BU ÖLKƏ dayanır - SENSASİON AÇIQLAMA

Martın 8-də Rusiyanın İsfahandakı konsulluq binasına hücum olub. Həmçinin Rusiya Prezidenti Vladimir Putinlə iranlı həmkarı Məsud Pezeşkian arasında təcili telefon danışığı baş tutub.   

Maraqlıdır, Putin Rusiyanı İsrail-İran-ABŞ müharibəsinə sövq edə bilərmi? 

Sözügedən mövzunu politoloq Əli Mustafa TodayPress TV-yə şərh edib. 

O bildirib ki, Rusiya ilə İranın münasibətləri hər zaman yaxşı olub və hazırda da bu dostluq və əməkdaşlıq davam edir. 

“Həm Rusiya rəsmilərinin, həm də İran tərəfdən verilən açıqlamalardan görünür ki, onlar əməkdaşlıqlarını və dostluqlarını qoruyurlar”.

Politoloq hesab edir ki, Rusiya İsrail-İran-ABŞ qarşıdurmasına gizli dəstək verir:

"İsfahanda Rusiya səfirliyinə edilən hücum və Prezident Pezeşkianla Putin arasındakı danışıqlar göstərir ki, Rusiya və İran arasında kommunikasiya mövcuddur. Hətta Rusiya prezidenti humanitar yardıma görə təşəkkür alıb və əlaqələr qorunub saxlanılır. Beləliklə, ehtimal etmək olar ki, Rusiya bir formada İsrail-İran-ABŞ qarşıdurmasını dəstəkləyir. Bu dəstək açıq formada görünmür, amma mümkündür ki, kosmik kəşfiyyat sahəsində və bəzi sursat təminatları ilə əməkdaşlıq edilir". 

Politoloq diqqətə çatdırıb ki,  Rusiya ilə İran arasında 500 milyon dollarlıq bir saziş imzalanmışdı və bu saziş çərçivəsində Rusiya İranı hava hücumundan müdafiə sistemləri ilə təmin etməli idi. Hazırda müharibə bu əməkdaşlıqda müəyyən pauza yarada bilər, amma savaşdan sonra İrandakı siyasi sistem dəyişməsə, əməkdaşlığın davam edəcəyi ehtimal olunur.

"Mən Rusiyanın açıq şəkildə bu müharibəyə müdaxilə edəcəyini real hesab etmirəm. Birincisi, Rusiyanın indiki resursları buna imkan vermir. Özü də Ukrayna savaşı Rusiya üçün ağır yükdür: 1000 kilometrdən çox cəbhə xətti, milyonlarla dollar xərclər, çoxlu silah və canlı itkilər. Bu şəraitdə Rusiyanın İrana açıq leqal dəstək verməsi real deyil", - analitik əlavə edib. 

Ə.Mustafa onu da vurğulayıb ki, Rusiya, faktiki olaraq, İrana müəyyən  köməklər göstərə bilər, çünki İran da ona həmişə dəstək olub və Rusiya da bunun əvəzini çıxmalıdır. Amma bu, rəsmi, yəni de-yure şəkildə olmayacaq. 

“Üstəlik, başqa ciddi bir məsələ var: Rusiya Amerika ilə münasibətlərini pozmaq istəmir. Rusiyanın diplomatiyasının əsas məqsədi ABŞ-ni Ukrayna müharibəsindən kənarda saxlamaqdır. Əgər Rusiya İrana açıq şəkildə dəstək verərsə, bu, ABŞ-nin müdaxiləsini şərtləndirə bilər. Bu səbəbdən düşünürəm ki, Putin İran münaqişəsinə açıq şəkildə qoşulmayacaq. Amma ehtimal olunur ki, ABŞ-nin diqqətindən kənar, gizli formada müəyyən dəstək göstərə bilər. Bu dəstəyin çox əhəmiyyətli olacağını gözləməsək də, İran raketlərinin Körfəz ölkələrinə, ABŞ bazalarına və İsrailə endirdiyi dəqiq zərbələrin arxasında Rusiyanın kəşfiyyat dəstəyinin olması ehtimalı gündəmdədir", - ekspert fikrini sonlandırıb.  

Qeyd dək ki, ABŞ və İsrail fevralın 28-dən etibarən İrana qarşı hərbi müdaxiləyə başlayıblar.  

Jalə Rövşən

TodayPress TV