İranda Ali Rəhbər nə zaman seçiləcək? – RƏY

Londonda fəaliyyət göstərən “Iran International” telekanalı vasitəsilə yayılan və dünyanın bir çox media qurumları tərəfindən tirajlanan xəbərlərə görə, Əli Xameneinin oğlu Müctəba Xameneinin ölkənin yeni ali dini lideri seçildiyi iddia olunur. 

Lakin bu məlumat hələ rəsmi şəkildə təsdiqlənməyib. 

İranın “Tasnim” agentliyi yayımladığı məlumatda bu xəbərləri dolayı yolla təkzib edən açıqlama təqdim edib. Agentliyin məlumatına görə, Ekspertlər Şurasının üzvü Ayətullah Xatəmi bildirib ki, yeni ali liderin seçilməsi prosesi davam edir.  

Rəsmi Tehran hələlik yeni ali dini liderin seçilməsi barədə yekun qərarın elan edildiyini təsdiqləmir.  

Bəzi iddialara görə isə, yeni ali lider artıq seçilib, lakin bu, açıqlanmır.

Məsələ ilə bağlı TodayPress TV-yə danışan politoloq Sədrəddin Soltan “Iran International”ın yaydığı xəbəri yalan adlandırıb.

Onun sözlərinə görə, İranda Ali Rəhbərin seçilməsi prosesi hələ baş verməyib:  

“Iran International” uzun müddətdir, belə fikirlər yayırdı ki, Əli Xamenei olmadığı halda onu varisi Müctəba Xamenei əvəz edəcək. Bu xəbər də həmin fikirlərin və mülahizələrin nəticəsi kimi təqdim olunub. Bu gün Dini Ekspertlər Şurasının üzvü Ayətullah Seyid Müctəba Hüseyni açıqlama verərək bildirib ki, hələ konkret namizədlər üzərində araşdırma aparılır və yalnız bundan sonra səsverməyə keçiləcək. Bundan başqa, Dini Ekspertlər Şurasının nəzdində qurumun üzvlərindən ibarət 11 nəfərlik komissiya fəaliyyət göstərir və Ali Rəhbərin müəyyənləşdirilməsi məhz bu komissiyanın səlahiyyətinə daxildir”.

Ekspert bildirib ki, İran Konstitusiyasında Ali Rəhbərin seçilməsi ilə bağlı konkret müddət göstərilməyib:  

“Lakin mövcud şəraitdə Ayətullah Əli Rza Ərəfi Ali Rəhbərin səlahiyyətlərini müvəqqəti olaraq icra edir. Müctəba Xamenei isə Ali Rəhbər seçilməyib. Digər tərəfdən, Ali Rəhbər seçilməsi üçün onun bir sıra göstəriciləri də Konstitusiyanın tələblərinə uyğun gəlmir. Belə ki, o, Ayətullah deyil və ölkədəki müxtəlif siyasi cərəyanların lideri kimi tanınmır. Hesab olunur ki, onun bir çox göstəriciləri Ali Rəhbər vəzifəsini tutmağa uyğun deyil. Məhz buna görə də Əlirza Ərəfi müvəqqəti olaraq Ali Rəhbərin səlahiyyətlərini icra edən şəxs kimi müəyyənləşdirilib”.

Qiymət Mahir

TodayPress TV