“İran yanır, Rusiya MİLYARDLAR QAZANIR” - Maksim Yalinin ŞƏRHİ

“Rusiya gözləmə mövqeyindədir. O, prinsip etibarilə, İrana qarşı hərbi əməliyyatların başlanmasından bəri yalnız üstünlüklər əldə edir”. 

Ukraynalı politoloq Maksim Yali bunu ABŞ-İsrail-İran müharibəsindən TodayPress TV-yə danışarkən deyib.  

O, qeyd edib ki, Rusiyanın “Urals” markalı neftinin qiyməti dekabr ayındakı qiymətlərlə müqayisədə iki dəfədən çox artıb: 

“Müharibə nə qədər uzun davam etsə, onlar bir o qədər çox vəsait əldə edəcəklər, o cümlədən Ukraynaya qarşı hərbi maşınlarını maliyyələşdirmək üçün fürsət tapacaqlar”. 

Professor əlavə edib ki, Ukraynanın hava hücumundan müdafiə sistemləri üçün raketlərin əldə edilməsində ciddi problemlərlə üzləşəcəyi artıq aydın görünür:

“Çünki İrana hücum edən Fars körfəzi ölkələri bu raketlərə kəskin ehtiyac duyur və onların alternativi yoxdur — söhbət "Patriot" sistemlərindən gedir. Ukrayna üçün də faktiki olaraq alternativ mövcud deyil”, - ekspert əlavə edib.  

Analitikin fikrincə, İran da Rusiya silahlarının, o cümlədən hava hücumundan müdafiə sistemlərinin tədarükünü xahiş və tələb edə bilər:

“Bu isə yüz milyonlarla, hətta milyardlarla dollar deməkdir. Buna görə də hazırkı mərhələdə Rusiya, demək olar ki, mütləq şəkildə birbaşa müdaxilə etməyəcək. Ola bilsin ki, artıq bəzi məlumatlarda qeyd edildiyi kimi, İran tərəfinə ABŞ-nin hərbi bazalarına zərbələr endirmək üçün kəşfiyyat məlumatları ötürsün. Bu isə onların strateji rəqibini zəiflədir”.  

Politoloq sonda əlavə edib ki, bu mövqenin dəyişəcəyini gözləməyə dəyməz: 

“Rusiya İran tərəfindən birbaşa döyüş əməliyyatlarında iştirak etməyəcək. Neftlə bağlı daha bir mühüm məqam da var: artıq Hindistanın Rusiya neftini almasına görə mümkün sanksiyaların müvəqqəti dayandırılması ilə bağlı yumşalma tətbiq olunub. Bundan əlavə, ABŞ-nin maliyyə naziri Scott Bessentin açıqlamalarına görə, yaranmış neft qıtlığını nəzərə alaraq Rusiyanın neft sektoruna qarşı sanksiyaların yumşaldılması da nəzərdən keçirilir. Bu da Rusiya üçün daha bir böyük üstünlük hesab olunur”. 

Qeyd edək ki, ABŞ və İsrail İrana qarşı hərbi əməliyyatlara fevralın 28-dən başlayıb. Bu hadisə Tehran və Vaşinqton administrasiyaları arasında danışıqların davam etdiyi bir dövrə təsadüf edib.  

 Jalə Rövşən

TodayPress TV