İddialara SƏRT CAVAB: İşğalçı siyasətin arxasında o dayanıb!

Erməni ekspert Vahram Atanesyan Ermənistan-Rusiya strateji tərəfdaşlığına ilk ciddi zərbənin 1993-cü ildə vurulduğunu deyib. Onun sözlərinə görə, o zaman Levon Ter-Petrosyan Xankəndidə çıxışında Kəlbəcərdən qoşunların çıxarılmasını rədd etməyin Yeltsinin düşmənçiliyini qazana biləcəyini deyib. O, qeyd edib ki, bu təklifdən imtina olunub və İrəvan Rusiya ilə münasibətlərini buna görə gərginləşdirib.

Politoloq Məhəmməd Əsədullazadə bu barədə TodayPress TV-yə danışıb.

Analitik məsələni belə şərh edib:

"Torpaqlarımızın işğalı Rusiyanın dəstəyi ilə baş verib. 1993-cü ildə Ermənistan Kəlbəcərə hücum etdi və ərazini işğal etdi. Bu dövrdə Ermənistan əleyhinə müəyyən proseslər gedirdi və ondan tələb olunurdu ki, oradakı qoşunları çıxartsın. BMT-nin qətnaməsi də buna çağırış edirdi. Lakin Rusiya bunu praktik olaraq tələb etmirdi, çünki həmin vaxt Ermənistanın təchizat zəncirini məhz Rusiya təmin edirdi. Rusiya maraqlı idi ki, Azərbaycan əraziləri işğal olunsun. Ona görə də indiki açıqlamalar və şərhlər, fikrimcə, sadəcə manipulyasiyadır və prosesləri bilməməkdən irəli gəlir".

O vurğulayıb ki, Rusiya Ermənistanın işğal siyasətini dəstəkləyib: 

"İşğalın arxasında məhz Rusiya dayanırdı. Levon Ter-Petrosyanı Yeltsin dəstəkləyirdi və həmin dövrdə Rusiya Azərbaycana ciddi təzyiqlər göstərirdi. Bu səbəbdən 1993-cü ildə Ermənistan-Rusiya strateji tərəfdaşlığı pozulmamışdı. Daha sonra Rusiya Ermənistana milyardlarla dollar dəyərində silah göndərdi, elə Yeltsinin dövründə.  1993-cü ildən sonra digər rayonlar da işğal edildi. Proses məhz bu müstəvidə gedirdi və Rusiya-Ermənistan tandemi Azərbaycan ərazilərinin işğalda qalmasını təmin edirdi. İşğal faktı Rusiya-Ermənistan ittifaqını daha da möhkəmləndirdi".

Ekspert onu da əlavə edib ki, bu günlərdə Ermənistanın Baş naziri Nikol Paşinyan real praktikaya söykənən siyasət aparır və Rusiyadan uzaqlaşır. Sülh gündəliyi artıq formalaşır. Hazırkı açıqlamalar isə sadəcə manipulyasiyadır.

Jalə Rövşən

TodayPress TV