Hərənin öz “qırmızı cizgisi”: Putinlə Zelenski harada görüşəcək?

Ukrayna Prezidenti Volodimir Zelenski ərazi məsələlərində irəliləyişə nail olmağın ən yaxşı yolunun Rusiya Prezidenti Vladimir Putinlə şəxsi görüşün olduğunu bildirib və qeyd edib ki, komandasına Cenevrədə liderlərin görüşünü təşkil etməyi tapşırıb.

Bəs sözügedən görüş baş tutsa, nə kimi üstünlüklər əldə oluna bilər?

Mövzu ilə bağlı politoloq Taleh Əliyev TodayPress TV-yə danışarkən bildirib ki, liderlərin üz-üzə görüşü faydalı ola bilər, lakin ilk görüş real sülhə zəmanət verməyəcək.

"Rusiyanın xüsusi hərbi əməliyyatlar adı altında həyata keçirdiyi işğalçılıq siyasətinin əsas tərəfləri Rusiya və Ukraynadır. ABŞ Prezidenti Donald Tramp münaqişənin istənilən formada həllinə daha çox təşəbbüs göstərsə də, həm Rusiya Prezidenti Vladimir Putin, həm də Ukrayna Prezidenti Volodimir Zelenski maksimalist və aydın mövqedən çıxış edir", - deyə analitik qeyd edib.

Siyasi şərhçi hesab edir ki, Putin 2014-cü ildə ilhaq edilmiş Donetsk və Luqansk istiqamətləri ilə yanaşı, 2022-ci ildən sonra nəzarətə götürülən Xerson və Zaporojye ərazilərinin Rusiyaya birləşdirilməsini əsas tələb kimi irəli sürür.

Onun sözlərinə görə, bundan əlavə, Ukraynanın NATO-ya üzv olmaması, neytral dövlətə çevrilməsi, rus dilinə dövlət dili statusunun verilməsi və rus mədəniyyətinə xüsusi imtiyazların tanınması Moskva üçün “qırmızı cizgi” hesab olunur. Zelenski isə 1990-cı ildə beynəlxalq birlik tərəfindən tanınmış sərhədlər çərçivəsində Ukraynanın ərazi bütövlüyü və suverenliyinə təminat verilməsi şərti ilə sülh müqaviləsinin imzalanmasında israr edir.

T. Əliyev vurğulayıb ki, Kiyev ABŞ-nin bəzi təkliflərini nəzərdən keçirsə də, öz “qırmızı cizgilərindən” geri çəkilmək niyyətində deyil.

"Liderlərin üz-üzə görüşü güzəşt limitlərinin müəyyənləşdirilməsi baxımından faydalı ola bilər. Lakin ilk görüş sülhə avtomatik zəmanət verməyəcək. Real nəticə yalnız vasitəçilərin iştirakı ilə hazırlanmış sülh gündəliyinin liderlər tərəfindən təsdiqlənməsi və davamlı danışıqlar mexanizminin formalaşdırılması halında mümkündür", - deyə ekspert izah edib.

Sonda politoloq vurğulayıb ki, hazırkı mərhələdə tərəflər vasitəçilərin iştirakı ilə keçirilən görüşlərdə öz “qırmızı cizgilərini” sonadək müdafiə edirlər və bu şəraitdə uzunmüddətli atəşkəs və real sülhün əldə olunması çətin görünür.

Aysel Mətləb

TodayPress TV