“Generallar əliboş gəlməyiblər”... — Qrexovun səfərinin PƏRDƏARXASI

Rusiya Müdafiə Nazirliyinin Silahlanma rəisi və Aerokosmik Qüvvələrin Silahlanma üzrə Baş Komandanının müavini general-polkovnik Yuri Qrexovun rəhbərlik etdiyi nümayəndə heyətinin fevralın 25-də Azərbaycana gözlənilməz səfəri ətrafında müzakirələr davam edir. 

Azərbaycan Müdafiə Nazirliyinin mətbuat xidmətinin açıqlamasında bildirilirdi ki, Rusiya nümayəndə heyəti müdafiə nazirinin müavini və Hərbi Hava Qüvvələrinin komandanı general-leytenant Namiq İslamzadə ilə görüşüb. 

Yuri Qrexov silahlanma sahəsinə cavabdeh şəxsdir. Bu, səfərin siyasi deyil, daha çox texniki-peşəkar xarakter daşıdığını göstərir.

Maraqlıdır, Azərbaycan Rusiya istehsalı olan hərbi sistemlərdən tam imtina etmək niyyətindədir, yoxsa?

Məsələ ilə bağlı TodayPress TV-yə danışan Azərbaycan Milli İstiqlal Partiyası (AMİP) funksioneri Əli Orucov Rusiya Müdafiə Nazirliyinin Silahlanma rəisi və Aerokosmik Qüvvələrin Silahlanma üzrə Baş Komandanının müavini, general-polkovnik Yuri Qrexovun rəhbərlik etdiyi nümayəndə heyətinin Azərbaycana səfərinin bir neçə mühüm məqsədə xidmət etdiyini bildirib:

“Birincisi regional və qlobal təhlükəsizlik, həmçinin iki dövlət arasında hərbi-strateji əməkdaşlığın dərinləşdirilməsi məsələləridir. Azərbaycan Moskvanın patronajlığı altında yaradılan Kollektiv Təhlükəsizlik Müqaviləsi Təşkilatının (KTMT) üzvü olmasa da, bu təşkilatda təmsil olunan dövlətlərlə Ermənistan istisna olmaqla strateji müttəfiqdir. AZAL-ın sərnişin təyyarəsinin vurulmasından sonra iki dövlət arasında dərin soyuqluq yarandı. Kremlin qeyri-dost mövqeyi və verdiyi vədlərə əməl etməməsi səbəbindən münasibətlərdəki sərinlik hələ də qalmaqdadır”.

Ekspertin sözlərinə görə, Azərbaycan ordusuna gəlincə, artıq Silahlı Qüvvələrin NATO standartlarına uyğunlaşdırılması və modernləşdirilməsi istiqamətində ciddi işlər aparılır. Ordunun silahlanması və komplektləşdirilməsində alternativ istiqamətlər tətbiq edilir. Azərbaycan son dövrlərdə öz silah sənayesini də xeyli dərəcədə təkmilləşdirib və genişləndirib. Bakı artıq dünya silah ixracatçısı olmaq iddiasını ortaya qoyub və bu istiqamətdə müəyyən uğurlara imza atmaqdadır. Silah bazarında Azərbaycan istehsalı olan silahlara tələbat və diqqət artır.

“Bu isə o deməkdir ki, Rusiya istehsalı olan silahlara Bakının ehtiyacı getdikcə azalır. Görünür, rusiyalı generalın Azərbaycana səfəri müəyyən mənada itirilən bazara yenidən qayıtmaq cəhdi kimi də qiymətləndirilə bilər. Onu da qeyd etmək lazımdır ki, Azərbaycan ordusunun arsenalında Rusiya istehsalı olan silahlar mövcuddur və bundan tam imtina olunmayıb.

Ortada hər hansı razılaşmalarla bağlı rəsmi məlumat olmasa da, heç şübhəsiz ki, generallar əliboş gəlməyiblər. Onların hansısa təkliflər və ya sənədlərlə Bakıya gəldiyini ehtimal etmək olar”, - deyə Əli Orucov fikrini yekunlaşdırıb.

Qiymət Mahir

TodayPress TV