Eşşəyi zebra kimi boyayıb, Ermənistan seçkilərinin gündəmini dəyişdirdilər - İrəvandan incilər...

Bu il Ermənistanda seçki kampaniyası o qədər rəngarəng keçir ki, bəzən adam unudur siyasətə baxır, yoxsa sirkə düşüb. Hətta  elə hadisələr baş verir ki, çox vaxt Ermənistan cəmiyyətində hazırda ən vacib siyasi  mövzuları kölgədə qoyur. Bütün ölkə gülür, paylaşır, müzakirə edir. İrəvanda  ən çox danışılan və viral olan   kuryozlar:                                              "Zebra eşşək" – kampaniyanın əsas ulduzu: 

İrəvanın  mərkəzi Myasnikyan prospektində bir gün birdən “zebra” peyda oldu. Maşınlar dayanır, insanlar telefonlarını çıxarıb video çəkirlər. Bu hadisə siyasətçilərin çıxışlarını belə arxa planda qoydu. Axırda məlum oldu ki, bu zebra yox, adi eşşəkdir. Sahibi heyvanı zolaqlı boyayla boyayıb, video çəkmək üçün küçəyə çıxarıb. Hadisə o qədər yayıldı ki, qlobala çıxdı. Bu hadisə Azərbaycanda məşhur ağdamlı lətifəsini  xatırladır: adam eşşəyini zebra kimi boyayıb satmaq istəyir.  Yerevanlı da eyni “yaradıcılıq” göstərib, nəticədə bütün Ermənistanı ciddi məsələlərdən ayırıb güldürə bilib. 

Samvel Karapetyanın “dil dərsi” 

Müxalifət lideri Samvel Karapetyan mitinqdə “haghtarshav” sözünü elə tələffüz edərkən  dili dolaşdı. Paşinyan bu fürsəti əldən verər? O da  Canlı efirdə rəqibinə erməni dili dərsi keçdi, düzgün tələffüzü göstərdi, üstəlik bir az da ələ saldı. O an dərhal bütün sosial şəbəkələrdə viral  oldu.   

Gagik Tsarukyanın şəxsi zooparkı: 

Oliqarx Gagik Tsarukyanın evində 2020-ci ildə keçirilən axtarışın görüntüləri yenidən gündəmə bomba kimi düşüb. Polislər evdən canlı aslanlar, zirehli maşınlar, bahalı avtomobillər çıxarır. Seçki vaxtı bu kadrlar yenidən ortalığa çıxdı və  hamı “Tsarukyanın şəxsi zooparkı” deyə lağ etməyə başladı.  

Müqəddəs Anna kilsəsində Paşinyana yaxınlaşıb ona toxunmaq istəyən gənc saxlanılıb. Hadisə gərginliyin nə qədər yüksək olduğunu bir daha göstərdi.   

Paşinyanın barabanı və “ürək" jesti  

Baş nazir  seçki kampaniyasını sosial media şousuna çevirib. Küçədə baraban çalır, gənclərlə “ürək” jesti edir, rəqs edir, canlı yayım aparır. Müxalifət buna “ucuz popülizm” deyir, amma gənclər arasında bu fəndlər çox işə yarayır.

Seçkilər getdikcə daha da maraqlı bir mənzərə alır. Siyasi rəqabətlə yanaşı, gündəmi daha çox qeyri-adi və sosial şəbəkələrdə yayılan hadisələr formalaşdırır. Cəmiyyətdə əsas söhbətlər də məhz bu rəngarəng və gözlənilməz görüntülər ətrafında cəmlənib. 

Jalə Rövşən