Əbu-Dabi görüşü: Sülh PRAKTİKİ MƏRHƏLƏYƏ daxil olur – RƏY

“Azərbaycan Prezidenti İlham Əliyevlə Ermənistanın Baş naziri Nikol Paşinyan arasında Əbu-Dabidə baş tutan görüş sülh prosesinin praktiki mərhələyə keçidini təmin edəcək”.

Milli Məclisin deputatı Azər Allahverənov bunu TodayPress TV-yə açıqlamasında deyib.

Onun sözlərinə görə, bu istiqamətdə görülən işlər barədə fikir mübadiləsinin aparılması iki dövlət arasında münasibətlərin normallaşdırılması üçün çox ciddi səylərin nümayiş etdirildiyini göstərir:

“Bunun nəticəsidir ki, Azərbaycan üzərindən Rusiya və Qazaxıstan taxılının Ermənistana çatdırılması, eləcə də Azərbaycanın neft məhsullarının Ermənistana ixracı artıq ticarət müstəvisində əlaqələrin qurulduğunu və bu əlaqələrin inkişafı üçün ciddi potensialın mövcud olduğunu göstərir. Lakin iki dövlət arasında münasibətlərin formalaşdırılması təkcə iqtisadi sahələrlə məhdudlaşmamalı, digər sahələrdə də mövcud imkanların dəyərləndirilməsi və bu əsasda onların reallaşdırılması üçün mühüm addımların atılması vacib hesab olunmalıdır”.

Parlamentari bildirib ki, Əbu-Dabidə keçirilən görüşdə diqqəti çəkən əsas məqam bilavasitə etimad quruculuğu məsələsidir:

“Avqustun 8-də Vaşinqtonda əldə olunan razılaşmalardan sonra Prezident İlham Əliyev media nümayəndələrinə verdiyi müsahibə zamanı xüsusilə qeyd etmişdi ki, Ermənistan üçün etimad məsələsi olduqca vacibdir və Paşinyan öz ölkəsində bunu təmin edəcək siyasət həyata keçirməlidir. Bunun üçün təkcə Azərbaycan üzərindən yüklərin daşınması və ya Azərbaycana aid neft məhsullarının Ermənistana ixracı kifayət etmir. Paşinyan bununla paralel olaraq ölkəsinin hüdudları daxilində də konkret addımlar atmalıdır. Bu məsələlərlə yanaşı, iki ölkənin vətəndaş cəmiyyətləri arasında əlaqələrin inkişaf etdirilməsi, qarşılıqlı səfərlərin təşkili və bu kimi fəaliyyətlərin miqyasının genişləndirilməsi də etimad quruculuğuna müsbət təsir göstərəcək amillər sırasındadır”.

Millət vəkili düşünür ki, Ermənistanda da bəzi praqmatik qüvvələr bu nəticələri düzgün dəyərləndirərək öz cəmiyyətinə müsbət mesajlar ötürürlər:

“Nəzərə alsaq ki, iyun ayında Ermənistanda parlament seçkilərinin keçirilməsi nəzərdə tutulur, bu amil sülh quruculuğu prosesində və qonşularla mehriban qonşuluq prinsipinə uyğun siyasətin formalaşdırılmasında Paşinyanın partiyasının parlament seçkilərində qalib gəlməsi üçün də mühüm faktor kimi qiymətləndirilə bilər. Bu baxımdan düşünürəm ki, Nikol Paşinyan əldə olunan nəticələrin erməni cəmiyyətində geniş şəkildə təbliğini aparmaqla yanaşı, revanşist və anti-Azərbaycan mövqeyi sərgiləyən qüvvələrə qarşı qətiyyətli siyasət yürüdəcək və eyni zamanda gələcəyə hesablanmış praqmatik siyasi kursun formalaşdırılmasına nail olacaq. Bu müsbət mesajlarla zəngin xəbər axını erməni cəmiyyətinin özündə də anti-Azərbaycan hisslərinin zəifləməsinə və gələcəkdə əldə olunan istiqamətlər üzrə imkanların daha da genişləndirilməsi üçün əlverişli zəminin yaranmasına şərait yaradacaq. Mümkün maneələr aşılaraq, xüsusilə Ermənistan Konstitusiyasına dəyişikliklər edildikdən sonra sülh müqaviləsinin bağlanması üçün uyğun mühit formalaşdırıla bilər”.  

A.Allahverənov vurğulayıb ki, Azərbaycanla Ermənistan arasında sülh prosesinin artıq geri dönməz və praktiki mərhələyə keçidi istiqamətində ciddi işlər görülməkdədir. 

Onun sözlərinə görə, gələcəkdə TRIPP layihəsinin işə salınması da bu istiqamətdə əldə olunan uğurların möhkəmləndirilməsinə xidmət edən mühüm amil kimi dəyərləndirilməlidir.

Qiymət Mahir

TodayPress TV