Davosda DİQQƏTÇƏKƏN FAKT! — Türk dövlətləri Avropanı keçdi

Məlum olduğu kimi, İsveçrənin Davos şəhərində keçirilən Dünya İqtisadi Forumu çərçivəsində ABŞ Prezidenti Donald Trampın təşəbbüsü ilə Qəzzanın müharibədən sonrakı bərpası və idarə olunmasını nəzərdə tutan “Sülh Şurasının Nizamnaməsi” imzalandı.

Sənədə imza atan ölkələr arasında ABŞ ilə yanaşı Azərbaycan, Türkiyə, Ermənistan, Argentina, Bəhreyn, Bolqarıstan, Macarıstan, İndoneziya, İordaniya, Qazaxıstan, Qətər, Mərakeş, Monqolustan, Birləşmiş Ərəb Əmirlikləri (BƏƏ), Pakistan, Paraqvay, Kosovo, Səudiyyə Ərəbistanı və Özbəkistan yer alıb. 

Siyahıya diqqət yetirildikdə maraqlı bir məqam da ortaya çıxır: Trampın təşəbbüsü ilə formalaşdırılan “Sülh Şurası”na qoşulan türk dövlətlərinin sayı Avropa ölkələrindən daha çoxdur. Belə ki, Avropadan sənədə Bolqarıstan, Macarıstan və Kosovo imza atdığı halda, türk dövlətləri sırasında Azərbaycan, Türkiyə, Qazaxıstan və Özbəkistan yer alır. 

Bu mənzərə isə təbii olaraq bir sual doğurur: Tramp administrasiyasının türk dövlətlərinə münasibətini və onların bu təşəbbüsdə fəal iştirakını necə xarakterizə etmək olar?

Sözügedən məsələni TodayPress TV-yə şərh edən   Ədalət, Hüquq, Demokratiya Partiyasının (ƏHD) ictimai-siyasi əlaqələr üzrə katibi, politoloq Azər Qasımov bildirib ki, Trampın “Sülh Şurası”, əslində, bu günə kimi siyasi arenada önə çıxmaq fürsəti olmayan ölkələr üçün bir şans oldu.

Bu baxımdan türk dövlətləri öz səslərini eşitdirmək üçün bu şuraya qoşuldular:

“Trampın şəxsi imici də bəzi ölkələri, o cümlədən Avropa ölkələrini bu şuradan uzaq tutdu. Proseslərin gedişatına uyğun olaraq, şuraya üzv ölkələrin sayının artmasının mümkün olması ehtimalı da var. Tramp xarakteri etibarilə elə xüsusiyyətə malikdir ki, onun yekəxana insanlardan xoşu gəlmir. O, sadə insanlarla münasibətlərə daha çox önəm verir. Onun müharibələri dayandırmaq cəhdləri də məhz bu yanaşma ilə bağlıdır”.

Ekspertin qənaətincə, türk dövlətləri gördükləri münasibətin cavabını “Sülh Şurası”na daxil olmaqla veriblər:

“Avropadan bu şuraya daxil olan ölkələr də ya türk köklüdür, ya da Bolqarıstan kimi uzun onilliklər boyu türklərin təsir dairəsində olublar. Hesab edirəm ki, Tramp da türk dövlətlərinin səmimiyyətinə inanır. Ona görə də türk dövlətlərinə qarşı səmimi davranır”.

Qiymət Mahir

TodayPress TV