Baydenin unutduğunu VENS XATIRLATDI: “Azərbaycan etibarlı tərəfdaşdır”

Fevralın 10-da Azərbaycan Respublikasının Prezidenti İlham Əliyev və Amerika Birləşmiş Ştatlarının Vitse-prezidenti Cey. Di. Vensin mətbuata bəyanatları iki ölkə arasında münasibətlərin strateji mahiyyətini bir daha ön plana çıxardı. 

Xüsusilə ABŞ-nin Vitse-prezidentinin səsləndirdiyi fikirlər Azərbaycanın qlobal təhlükəsizlik arxitekturasındakı roluna verilən açıq və yüksək səviyyəli siyasi qiymət kimi diqqət çəkdi.

Vitse-prezident çıxışında vurğuladı ki, azərbaycanlılar Əfqanıstandan çıxan ən sonuncu tərəf olublar və dünya səviyyəsində terrorçuluğa qarşı aparılan mübarizəyə çox böyük dəstək veriblər. O, xatırladıb ki, Azərbaycan hərbçiləri ABŞ-nin hərbi dənizçiləri ilə Əfqanıstanda çiyin-çiyinə vuruşub və faktiki olaraq, dünyanın istənilən nöqtəsində nümunə göstərilə biləcək, az sayda olan ən mübariz və cəsarətli qoşunlardan biri kimi nüfuz qazanıblar.

Bu bəyanat təkcə keçmiş hərbi əməkdaşlığın xatırladılması deyil, həm də Azərbaycanın etibarlı tərəfdaş kimi qəbul olunmasının açıq mesajıdır və mövcud geosiyasi reallıqlar fonunda xüsusi əhəmiyyət daşıyır.

Sözügedən məsələni TodayPress TV-yə şərh edən siyasi məsələlər üzrə analitik Əziz Əlibəyli bildirib ki, Azərbaycan qlobal antiterror kampaniyasına qoşulan ilk ölkələrdən biri olub və bu prosesə əməli qaydada dəstək verib:

“Azərbaycan müxtəlif dövrlərdə BMT-nin sülhməramlı qüvvələrinin tərkibində xüsusi missiyalarda iştirak edib, humanitar aksiyalara dəstək göstərib. Vensin fikirləri, həmçinin onu göstərir ki, Azərbaycan imzasına sadiqdir və etibarlı imicə malikdir. Bir zamanlar Azərbaycana arxa çevirən sabiq ABŞ administrasiyası isə bunları unutmağa çalışır, Azərbaycanın göstərdiyi xidmətləri görməzdən gəlirdi”.

Ekspert əlavə edib ki, hazırda Azərbaycanın geosiyasi rolu ABŞ ilə yüksələn əməkdaşlığın əsas səbəblərindən biridir:

“Əgər Şərqə gəlirsənsə, Azərbaycansız mümkün deyil. İstər kommunikasiya xətləri, istər Orta Asiyanın əməkdaşlığa cəlbi – bütün bunlar Azərbaycan vasitəsilə mümkündür”.

Qiymət Mahir

TodayPress TV