"10 il döyüşməyə hazırıq!" - Tehran bütün təklifləri RƏDD EDİR...

İran Rusiya, Fransa və Çinin atəşkəs təklifini rədd edib. Bunun üçün bəzi tələblər irəli sürüb. 

Şərtlərdən biri ilkin olaraq ölkəyə yenidən təcavüz olunmaması ilə bağlıdır. Tərəflər kompramisə getmir. İran isə ABŞ ilə danışıqları da rədd edir. 

Bəs atəşkəs üçün əlavə şərtlərin qoyulması münaqişənin həll prosesinə necə təsir edə bilər?  

Sözügedən məsələni politoloq Elçin Xalidbəyli TodayPress TV-yə şərh edib.  

Analitik qeyd edib ki, iranlı generallardan biri İranın 10 illik müharibəyə hazır olduğunu bildirib:  

“Ola bilsin ki, məhz bu cür mesajlar və açıqlamalar rəsmi Tehranın yeni siyasi kursunun əsasını təşkil edir. Burada əsas məsələ İranın ABŞ-nin təzyiqlərinə qarşı yeni müqavimət modeli tapmaq cəhdləridir. İran böyük ehtimalla növbəti dəfə ABŞ ilə danışıqlar masasına məğlub tərəf və ya şərtləri qəbul etməli olan tərəf kimi əyləşmək istəmir. Danışıqlar masasına oturmazdan əvvəl bərabər bir balans yaratmağa çalışır. İranda hesab edirlər ki, əgər müharibə baş veribsə və İran tam məğlub edilməyibsə, bu, ABŞ-nin  şərtlərinin qəbul olunması deyil, İranın da ABŞ-yə müəyyən şərtlər irəli sürməsi ilə nəticələnməlidir. Rəsmi Tehran bu baxımdan situasiyanın və siyasi balansın yaradılmasına çalışır”. 

Ekspertin qənaətincə, bu səbəbdən ilkin mərhələdə Fransa, Rusiya və Çinin təklif etdiyi sülh danışıqlarını rədd edir və İran üçün müəyyən təminatlar tələb edir. Bu təminatlar ABŞ-nin İranın tələblərinə necə reaksiya verəcəyini müəyyən edəcək və böyük ehtimalla gələcək proseslərin inkişaf istiqamətini formalaşdıracaq.

Politoloq sonda vurğulayıb ki, hazırkı mərhələdə kompromis ehtimalları o qədər də yüksək görünmür: 

"Çünki Prezident Tramp bəyan edib ki, İranla heç bir razılaşma olmayacaq və İran qeyd-şərtsiz təslim olmalıdır; əks halda müharibə davam edə bilər. Eyni zamanda, bir müddət əvvəl ABŞ İranla müharibənin bitdiyini də bəyan edib. Burada əsas məsələ Trampın və ABŞ-nin tutacağı mövqe olub, bu da İran savaşının gələcək istiqamətini böyük ölçüdə müəyyən edəcək".  

Jalə Rövşən

TodayPress TV