Yaponiyada pişiklərin ömrünü uzadan yeni dərman hazırlandı

Yaponiyada alimlər xroniki böyrək xəstəliyindən əziyyət çəkən pişiklərin ömrünü əhəmiyyətli dərəcədə uzada bilən yeni preparat hazırlayıblar.

TodayPress TV xəbər verir ki, "Mothership" nəşrinin məlumatına görə, yapon alim Toru Miyadzaki tərəfindən hazırlanmış eksperimental dərman pişiklərdə xroniki böyrək xəstəliyinin inkişafını dayandırmağa və ya ciddi şəkildə ləngitməyə imkan verir. Bu xəstəlik ev pişikləri arasında ən geniş yayılmış və təhlükəli problemlərdən biri hesab olunur.

Alimin sözlərinə görə, problemin kökündə pişiklərin immun sisteminin spesifik xüsusiyyəti dayanır. Belə ki, pişik orqanizmində böyrəklərin tullantıları təmizləməsində mühüm rol oynayan AIM (makrofaqların apoptoz inhibitoru) adlı zülal aktivləşmir. Nəticədə parçalanma məhsulları böyrəklərdə toplanır və zamanla böyrək çatışmazlığına səbəb olur.

Araşdırmalar zamanı müəyyən edilib ki, AIM zülalının xaricdən orqanizmə verilməsi böyrəklərin özünü təmizləmə qabiliyyətini bərpa edə bilər. Bu kəşf əsasında hazırlanmış yeni preparat pişik orqanizmini lazımi zülalla təmin edir və xəstəliyin irəliləməsini dayandırır.

Sınaqların nəticələrinə görə, ağır böyrək xəstəliyindən əziyyət çəkən pişiklərin təxminən 85 faizi müalicədən sonra sağ qalıb.

“Vacib məqam ondan ibarətdir ki, bu pişiklər təkcə sağ qalmayıb, eyni zamanda sağlam vəziyyətdə həyatlarını davam etdiriblər”, — deyə Toru Miyadzaki bildirib.

Alim preparatın 2026-cı ilin aprelində Yaponiya hökumətinə təsdiq üçün təqdim ediləcəyini, həmin ilin sonuna qədər isə istifadəyə icazə alınmasının planlaşdırıldığını açıqlayıb. Gələcəkdə dərmanın mümkün qədər çox baytarlıq klinikasında münasib qiymətə əlçatan olması nəzərdə tutulur.

Qeyd edək ki, bundan əvvəl Yaponiyada nəcisin analizini aparan “ağıllı” unitazlar da hazırlanmışdı.

Qiymət Mahir