Saxta sənəd hər şeyi dəyişdi – məşqçi işsiz qaldı

İsveçrə yığmasının baş məşqçisi saxta COVID sənədinə görə işdən çıxarılıb. 

TodayPress TV xəbər verir ki, bu barədə İsveçrə Xokkey Federasiyasının (SIHF) saytında məlumat yayılıb. 

Patrik Fișer İsveçrə milli xokkey komandasının baş məşqçisi vəzifəsindən azad olunub.

Qərar İsveçrə Xokkey Federasiyası tərəfindən qəbul edilib. Səbəb mütəxəssisin 2022-ci ildə keçirilən Qış Olimpiya Oyunları zamanı saxta COVID-19 vaksin sertifikatından istifadə etməsi olub.

Məlumata görə, Fișer Pekinə səfər zamanı tətbiq olunan məhdudiyyətləri aşmaq üçün peyvənd olunduğunu göstərən saxta sənəddən yararlanıb. O, məsələ ilə bağlı açıqlamasında ciddi səhvə yol verdiyini etiraf edib.

Qeyd edək ki, Patrik Fișer 2015-ci ildən İsveçrə millisinin baş məşqçisi idi. O, komandanı üç Olimpiadaya çıxarıb. Fişerin rəhbərliyi altında yığma dünya çempionatlarında üç gümüş medal qazanıb. 2022-ci il Olimpiadasında isə İsveçrə yığması 1/4 final mərhələsinə qədər irəliləyib.

Namiq HUN

TodayPress TV