Kapitanın vida matçı: Mahmudov Andorraya qarşı son dəfə oynayacaq!
Futbol üzrə Azərbaycan millisinin kapitanı və yarımmüdafiəçisi Emin Mahmudov yığmada çıxışını başa çatdırmaq qərarına gəlib.
TodayPress TV xəbər verir ki, bu barədə AFFA-nın mətbuat xidməti məlumat yayıb.
Bildirilib ki, 34 yaşlı futbolçu federasiya rəhbərliyi ilə apardığı məsləhətləşmələrdən sonra belə qərar verib. Noyabrın 16-da Andorra yığmasına qarşı keçiriləcək yoldaşlıq görüşü Mahmudovun Azərbaycan millisinin heyətində son oyunu olacaq.
Qeyd edək ki, 2016-cı ildən milli komandada çıxış edən Emin Mahmudov indiyədək 15 qol vurub. O, bu göstərici ilə Azərbaycan millisinin tarixində ən çox qol vuran futbolçudur.
