Fiqurlu konkisürmədə bir dövr başa çatdı!

Fiqurlu konkisürənlər Riku Miura və Riyuçi Kihara idman karyeralarını başa vurduqlarını açıqlayıblar.

TodayPress TV xəbər verir ki, idmançılar bu barədə sosial şəbəkə hesablarında məlumat yayıblar.

Milan-2026 Qış Olimpiadasının çempionları mövsümün sonunda fiqurlu konkisürmə ilə vidalaşacaqlarını bildiriblər:

“Biz, Riku Miura və Riyuçi Kihara, cari mövsümün sonunda karyeramızı başa vurmaq qərarına gəldik. Bizə dəstək olan hər kəsə dərin minnətdarlığımızı bildiririk. Bu yolda qarşılaşdığımız çətinlikləri məhz bu dəstək sayəsində aşdıq və əldə etdiyimiz uğurlarla fəxr edirik”.

Onlar əlavə ediblər ki, yarış karyeraları bitsə də, fiqurlu konkisürmənin Yaponiyada daha da inkişafı üçün fəaliyyətlərini davam etdirəcəklər.

Qeyd edək ki, cütlüyün aktivində Milan Olimpiadasında qazanılan qızıl və gümüş medallar, Pekin-2022 Qış Olimpiadasında komanda yarışında gümüş, həmçinin dünya çempionatlarında iki qızıl və iki gümüş medal var.

Namiq HUN

TodayPress TV