“Baks” çöküş yaşayır: NBA tarixinin ən zəif komandası ola bilər!
“Miluoki Baks” NBA tarixində bir mövsüm ərzində qələbə faizinə görə antirekord müəyyənləşdirmək təhlükəsi ilə üzləşib.
TodayPress TV xəbər verir ki, bu barədə “Basketball Forever” nəşri məlumat yayıb.
2026/2027-ci illər mövsümündə keçirdiyi 15 oyundan sonra “Miluoki”nin cəmi bir qələbəsi var. Komanda 14 dəfə məğlub olub. Əgər kollektiv hazırkı nəticə göstəricisini (6,7%) qoruyub saxlasa, 82 matçlıq müntəzəm çempionatı təxminən 5 qələbə və 77 məğlubiyyətlə başa vura bilər.
NBA tarixində qələbə faizinə görə antirekord “Şarlott Bobkets”ə məxsusdur. Komanda 2011/2012-ci illər mövsümündə lokaut səbəbindən qısaldılmış çempionatı 7 qələbə və 59 məğlubiyyətlə (10,6%) tamamlayıb.
82 oyunluq tam mövsümdə isə ən zəif nəticəni 1972/1973-cü illərdə “Filadelfiya” göstərib. Komanda həmin çempionatda 9 qələbə qazanıb, 73 dəfə məğlub olub.
Qeyd edək ki, “Miluoki” artıq ilk 15 qarşılaşmanın nəticələrinə görə klub antirekordunu müəyyənləşdirib. Komanda son matçında “Mayami Hit”ə 130:137 hesabı ilə uduzaraq ardıcıl 11-ci məğlubiyyətini alıb.
Namiq HUN