Alman qolkiper ehtiyatda qalmaq istəmir

“Barselona” klubunun qapıçısı Mark-Andre ter Ştegen yanvar ayında Səudiyyə Ərəbistanında keçiriləcək İspaniya Superkubokunda iştirak etməyi planlaşdırır. 

TodayPress TV xəbər verir ki, bu barədə Mundo Deportivo nəşri məlumat yayıb.

Milad fasiləsindən sonra 33 yaşlı qolkiper əsas komanda ilə birlikdə məşqlərə qayıdıb və mümkün qədər tez rəsmi oyunlara dönməyi hədəfləyir. Karyerasında mümkün dəyişikliklərlə bağlı söz-söhbətlərə baxmayaraq, alman futbolçu gələcəyini hələ də Kataloniya klubu ilə bağlayır.

Ter Ştegen müntəzəm oyun praktikası əldə etməkdə maraqlıdır və İspaniya Kubokunda şans qazanacağına ümid edir. O, həmçinin Superkubok matçlarında iştirakını da istisna etmir.

Qolkiper üçün əsas şərt ehtiyat oyunçu rolunu qəbul etməməkdir. Digər klubların marağına baxmayaraq, o, daimi oynamaq imkanı olmayan variantları nəzərdən keçirmir.

Qeyd edək ki, Ter Ştegenin “Barselona” ilə müqaviləsi 2028-ci ilin yayına qədər qüvvədədir. Daha əvvəl mətbuatda onun “Jirona”ya icarəyə göndərilməsi ilə bağlı xəbərlər yayılmışdı, lakin qolkiper zəmanətli oyun vaxtı olmayan variantlara isti yanaşmır.

Namiq HUN

TodayPress TV