Yunanıstan və Fransa strateji əməkdaşlığı genişləndirdilər

Yunanıstan və Fransa müdafiə sahəsində əməkdaşlıq sazişini yeniləyib və ikitərəfli əlaqələri bir çox sektorlar üzrə genişləndiriblər.

TodayPress TV xəbər verir ki, Fransa Prezidenti Emmanuel Makron və Yunanıstanın Baş naziri Kiriakos Mitsotakis Afinadakı "Maximos" iqamətgahında keçirilən mərasimdə ilk dəfə 2021-ci ildə imzalanmış müdafiə paktının müddətini daha beş il uzadıblar.

Sənəddə müddət bitdikdən sonra müqavilənin avtomatik yenilənməsi bəndi də yer alıb.

Yenilənmiş sazişə qarşılıqlı müdafiə yardımı bəndi daxildir ki, bu da hər iki ölkənin suverenliyinə təhlükə yarandığı təqdirdə bir-birinə dəstək vermək öhdəliyini nəzərdə tutur.

Tərəflər həmçinin təhsil, peşə hazırlığı, elmi tədqiqat, innovasiya, energetika, ətraf mühitin mühafizəsi və nüvə texnologiyaları daxil olmaqla, müxtəlif sahələri əhatə edən doqquz saziş imzalayaraq strateji əməkdaşlığı genişləndiriblər.

Hər iki lider Ukrayna və Yaxın Şərqdəki müharibələrin dayandırılmasına çağırıb, həmçinin dəniz naviqasiyasının təhlükəsizliyinin təmin edilməsinin, o cümlədən Hörmüz boğazının yenidən açılmasının vacibliyini qeyd ediblər.

Aysel Mətləb

TodayPress TV