Ukraynanın Drujkovka şəhəri bombalandı

Fevralın 4-də Rusiya ordusu Ukraynanın Drujkovka şəhərində bazara kaset mərmiləri ilə zərbələr endirib, şəhərin özünə isə iki aviabomba atıb. Hazırda 7 nəfərin həlak olduğu, 15 nəfərin isə yaralandığı məlumdur.

TodayPress TV  xəbər verir ki, bu barədə Donetsk vilayəti Dövlət Administrasiyasının rəhbəri Vadim Filaşkin "Telegram" kanalında bildirib.

Onun sözlərinə görə, Rusiya tərəfi cəbhə xəttinə yaxın yerləşən şəhəri kaset mərmiləri ilə atəşə tutub. Zərbə insanların səhər saatlarında kütləvi toplaşdığı məkan olan bazara dəyib.

“Bu, növbəti məqsədli hərbi cinayətdir və Rusiya üçün “atəşkəs” barədə bütün bəyanatlarının heç bir dəyəri olmadığını bir daha göstərir. Yaşı 43-dən 81-ə qədər olan ən azı 7 nəfər həlak olub. 50-72 yaş aralığında olan 15 nəfər isə yaralanıb”, - Vadim Filaşkin vurğulayıb.

Bütün aidiyyəti xidmətlər hadisə yerindədir, zərərçəkənlərə yardım göstərilir və zərbələrin nəticələri aradan qaldırılır. Sənaye zonası, 3 çoxmərtəbəli bina və 3 fərdi yaşayış evinə ziyan dəyib.

TodayPress TV