Tayvan ətrafında 96 saatda Pakistanın etdikləri - Sakit Okean isindi
Tayvan ətrafında baş verənlər artıq təkcə Pekinlə Taypey arasındakı siyasi qarşıdurma ilə məhdudlaşmır. Regionda hərbi fəallığın artması, diplomatik təzyiqlər və hava nəqliyyatı ilə bağlı qərarlar diqqətləri Asiyada güc balansının dəyişməsi ehtimalına yönəldir. Bu prosesdə Pakistanın mövqeyi isə Çinin strategiyası ilə bağlı yeni suallar doğurur.
TodayPress TV “Guo Shen”in “X” kanalına istinadən xəbər verir ki, Çin və Pakistan cəmi 96 saat ərzində Tayvana qarşı 5 addım atıb.
Və heç kim bu hadisələr arasındakı əlaqəni görmür.
1-ci addım: Pakistan Çinə dəstək məqsədilə bütün Tayvan aviaşirkətlərinin öz hava məkanından istifadəsini qadağan edib.
Tarixdə bunu edən ilk ölkə olduğu iddia edilir.
“Biz yalnız Çin aviaşirkətlərinin Pakistan üzərindən uçmasına icazə veririk”.
Avropaya həyata keçirilən 12-dən çox reys Rusiyanın hava məkanı üzərindən yönləndirilib. Bu isə uçuş müddətinin bir neçə saat uzanmasına səbəb olub.
2-ci addım: Çin Mərkəzi Televiziyası Tayvana aid 42 saniyəlik peyk görüntüsü yayımlayıb:
“Bura Çinin Tayvan əyalətidir”.
“Buradakı hər küçə aydın görünür”.
Bu, sadəcə, mənzərəni əks etdirən görüntü deyil. Bu, hədəflərin siyahısıdır.
3-cü addım: Pekinin Tayvan məsələləri üzrə məsul şəxsi ada daxilindəki “vətənpərvər birlik qüvvələrinə” dəstək verəcəyinə söz verib. Tayvanda gələn ay səsvermə keçiriləcək. Təzyiq artıq adanın daxilinə yönəlib.
4-cü addım: Çinin “Liaoning” təyyarədaşıyan gəmisi Filippinlərə 50 dəniz mili məsafəsinədək yaxınlaşıb.
Müharibənin Öyrənilməsi İnstitutunun qiymətləndirməsinə görə, bu addım mümkün münaqişə zamanı Tayvanı təcrid etmək ssenarisinin məşqi ola bilər.
Bundan əlavə, bir gün ərzində Tayvan ətrafında Çin Hərbi Dəniz Qüvvələrinə məxsus 8 gəmi qeydə alınıb.
Bu, adı açıqlanmayan blokada təlimidir.
5-ci addım: Pekin Tayvanı “təxribat törətməkdə və qarşıdurma yaratmaqda” ittiham edib.
Bundan əvvəl Tayvan hakimiyyəti Çin lideri Si Cinpini ələ salan komediyaçını hədələmək, onun əl-ayağını sındırmaq planı qurmaqda ittiham olunan 5 nəfərə qarşı məhkəmə iddiası qaldırmışdı.
Səsvermə ərəfəsində isə məsuliyyət qarşı tərəfin üzərinə atılıb.
Bu 96 saatlıq dövrdən əvvəl baş verənlər də diqqət çəkir:
Çin eyni vaxtda 16 hərbi gəmi ilə Tayvan və Donqşa adası ətrafında fəaliyyət göstərib.
Çin Paraqvay və Beliz rəsmilərinə qarşı sanksiyalar tətbiq edib.
Hazırda yalnız 12 ölkə Tayvanı rəsmi şəkildə tanıyır.
Bütün bu hadisələri bir araya gətirdikdə mənzərə belə görünür:
Pakistanın qadağası — Tayvanın hava məkanına çıxış imkanlarının məhdudlaşdırılması.
Peyk görüntüləri — adanın hər küçəsinin xəritələşdirilməsi.
“Vətənpərvər qüvvələrə” dəstək vədi — Tayvan cəmiyyətinin və seçicilərinin parçalanması cəhdi.
Təyyarədaşıyan gəminin fəaliyyəti — mümkün blokadanın sınağı.
“Təxribat” ittihamları — məsuliyyətin qarşı tərəfin üzərinə yönəldilməsi.
Bu, xaos deyil. Bu, sistemli təzyiq strategiyasıdır.
Bir hava məkanından digərinə.
Bir küçədən digərinə.
Bir müttəfiqdən digərinə.
Səsverməyə cəmi bir neçə həftə qalıb. İddialara görə, Pekin 96 saat ərzində ərazinin xəritələşdirilməsi, məsuliyyətin qarşı tərəfə yönəldilməsi və hava məkanına çıxışın məhdudlaşdırılması istiqamətində addımlar atıb. Pakistan bu addımı atan ilk ölkə olub.
Bəs növbəti ölkə kim olacaq? Bu barədə hələlik heç kim danışmır.
Zəhra Məmmədova
