Çin Pakistanın "PRSC-EO3" peykini orbitə buraxdı

Çin ölkənin şimalındakı Şansi əyalətində yerləşən Tayyuan Peyk Buraxılış Mərkəzindən Pakistanın məsafədən zondlama peykini uğurla orbitə buraxıb.

TodayPress TV xəbər verir ki, bu barədə "Sinxua" agentliyi məlumat yayıb.

Bildirilib ki, "PRSC-EO3" adlanan peyk "Long March-6" raketi vasitəsilə kosmosa göndərilib. Rəsmi hesabatlara görə, peyk uğurla planlaşdırılan orbitə daxil olub.

Qeyd edək ki, bu buraxılış Çinin genişlənən kosmik proqramının əsas tərkib hissəsi olan "Long March" raket seriyasının 640-cı missiyasıdır. "PRSC-EO3" peykinin Pakistanın Yer səthini müşahidə imkanlarını, o cümlədən təbii sərvətlərin monitorinqi, fəlakətlərin idarə olunması və ətraf mühit dəyişikliklərinin izlənilməsi sahəsindəki potensialını gücləndirəcəyi gözlənilir.

Aysel Mətləb

TodayPress TV