Dünya əhalisinin təxminən 70 faizinin şəhərlərdə yaşayacağı gözlənilir
“Təhlillərə əsasən, XXI əsrin ortalarına qədər dünya əhalisinin təxminən 70 faizinin şəhərlərdə yaşayacağı gözlənilir. Eyni zamanda, urbanizasiya bir sıra sosial problemləri daha da kəskinləşdirir. Bu gün dünya miqyasında təxminən 3 milyard insan adekvat mənzil təminatından məhrumdur. Onlardan 1 milyarddan çoxu qeyri-formal məskunlaşma yerlərində və gecəqondularda yaşayır, 300 milyondan çox insanın isə ümumiyyətlə sığınacağı yoxdur”.
TodayPress TV xəbər verir ki, bunu Ümumdünya Şəhərsalma Forumunun 13-cü sessiyası (WUF13) çərçivəsində keçirilən Liderlərin Bəyanatları (Leaders' Statements) mərhələsində Özbəkistan Respublikasının Prezidenti Şavkat Mirziyoyev deyib.
Özbəkistan dövlət başçısı qlobal miqrasiya dalğalarına, urbanizasiya çağırışlarına və Özbəkistanın bu istiqamətdəki strateji planlarına diqqət çəkib:
“İqlim dəyişiklikləri, qeyri-sabit beynəlxalq vəziyyət və iqtisadi böhranlar qlobal miqrasiyanın yeni dalğalarını yaradır ki, bu da ölkələr və şəhərlər arasında əhalinin yenidən paylanmasına gətirib çıxarır. Sadə dillə desək, urbanizasiya prosesləri qlobal sabitliyə və təhlükəsizliyə birbaşa təsir edən kritik amilə çevrilir. Bütün bunlar bizdən qətiyyətli və təxirəsalınmaz tədbirlər görməyi tələb edir.
Şəhərlərin dayanıqlı inkişafı məsələsi yeni Özbəkistan üçün strateji əhəmiyyət kəsb edir. Növbəti 15 il ərzində ölkəmiz əhalisinin 38 milyondan 50 milyona qədər artacağı, urbanizasiya səviyyəsinin isə 51 faizdən 65 faizə yüksələcəyi gözlənilir. Hesab edirik ki, bu, regional inkişafın balanslaşdırılmasını təşviq etmək və iqtisadi artımı təmin etmək üçün unikal bir imkandır”.
Qiymət Mahir
