Çindən Azərbaycana yüklərin çatdırılma müddəti azaldıldı

Çin və Azərbaycan arasında Orta Dəhliz dəmir yolu marşrutu boyunca orta tranzit müddəti 2026-cı ilin əvvəlində azalıb.

TodayPress TV xəbər verir ki, bu barədə Pekin “Cross-Eurasia International Logistics” şirkətinin idarəedici direktoru Vanq Xu Donq sosial mediada paylaşım edib.

O bildirib ki, 2026-cı ilin yanvar ayında Sian-Bakı marşrutu üzrə yük daşımalarının orta çatdırılma müddəti 16 gün təşkil edib ki, bu da 2025-ci ilin dekabr ayındakı 17 gündən bir gün daha sürətlidir.

Bundan əlavə, yanvar ayında bu marşrutla səkkiz yük qatarı yola salınıb, dekabr ayında isə bu rəqəm 11 olub.

Qeyd edək ki, Orta Dəhliz kimi də tanınan Transxəzər Beynəlxalq Nəqliyyat Marşrutu 2019-cu ildə Çinin Sian şəhərindən Azərbaycanın Bakı şəhərinə müntəzəm konteyner qatarları ilə əməliyyatları intensivləşdirib və təkcə 2025-ci ilə qədər bu marşrut üzrə 400-dən çox səfər həyata keçirilib. 

Aysel Mətləb

TodayPress TV