Zelenskinin Azərbaycan səfərinə rus mediasında ikili yanaşma: İddialar və Bakının mövqeyi

"Rusiya Ukraynaya qarşı işğalçı müharibə apardığına görə Volodimir Zelenskinin xarici ölkələrə səfərlərini demək olar ki, lupa ilə izləyir, onun müxtəlif ölkələrlə əldə etdiyi razılaşmaların təhlilini aparırlar"

TodayPress TV xəbər verir ki, bunu politoloq Elxan Şahinoğlu "Facebook" hesabında yazıb.

Onun müşahidələrinə əsasən,  Rusiya mediasında  Zelenskinin Azərbaycana səfərinə iki cür yanaşılır: "Rusiya mediasının bir hissəsi sadəcə Zelenskinin səfəri və Azərbaycan Prezidenti İlham Əliyevlə əldə edilən razılaşmalar barədə xəbərlər yayımlayıb. Digər hissə isə Ukrayna–Azərbaycan əməkdaşlığının guya Rusiya əleyhinə yönəldiyini iddia edib. Saytlardan birində hətta “Azərbaycan Rusiyaya arxadan zərbə vurdu” ifadəsinə də rast gəldim. Kimin kimə arxadan zərbə vurduğunu 2014-cü ildə Azərbaycanın mülki təyyarəsinin Rusiyanın hava məkanında raketlə vurulması və vətəndaşlarımızın həlak olması açıq şəkildə göstərir. Rusiya tərəfdən yüksək səviyyədə verilən vədlərə baxmayaraq, ölənlərin ailələrinə və yaralılara təzminat hələ də ödənilməyib". 

Analitik qeyd edib ki, Volodimir Zelenskinin İlham Əliyevlə birgə mətbuat konfransında “Ukrayna və Rusiya nümayəndələri arasında növbəti görüşün Azərbaycanda keçirilməsini təklif edirəm” bəyanatına da şimal qonşumuzdan ikili reaksiya var: 

"Rusiya Federasiya Şurasının Beynəlxalq məsələlər üzrə komitəsinin birinci müavini Vladimir Cabarov danışıqların Azərbaycanda keçirilməsini mümkün hesab edib. Onun həmkarı, Dövlət Dumasının MDB ölkələri ilə iş komitəsi sədrinin birinci müavini Konstantin Zatulin isə görüşün Azərbaycanda keçirilməsinin əleyhinə olduğunu bildirib. Erməni radikallarla işbirliyi içində olan Zatulindən başqa reaksiya gözləmək təəccüblü olmazdı. Həmin komitənin digər sədr müavini Viktor Volodatski də Zatulinlə eyni mövqedən çıxış edib".

Politoloq bildirib ki,  Rusiya mediası Rusiya və Ukrayna təmsilçilərinin Bakıda görüşünün təşkilinin Azərbaycanın xarici siyasətinin əsas hədəflərindən olduğunu zənn edir:

"Bu, Zelenskinin təklifidir. Ukrayna Prezidenti Azərbaycanın balanslaşdırılmış xarici siyasətinə istinad edərək görüş yeri kimi ölkəmizi təklif edib. Bizim belə bir təcrübəmiz var: vaxtilə Türkiyə və İsrail arasında danışıqlar Bakıda aparılıb, elə Rusiya Baş Qərargahının rəisi də vaxtilə NATO komandanlığı ilə bir neçə dəfə paytaxtımızda görüşüb. Aydındır ki, Moskva Ukrayna təmsilçiləri ilə görüşün Azərbaycan ərazisində keçirilməsinə tərəfdar olmayacaqsa, mümkün görüş başqa ölkədə keçiriləcək. Bu, bizim üçün problem deyil, təki müharibəyə son qoyulsun".

Elxan Şahinoğlu Rusiyanın bəzi dairələrində səslənən “Azərbaycan niyə Ukrayna ilə hərbi-texniki sahədə əməkdaşlığı genişləndirmək istəyir” sualına cavab verib: 

"Bu bizim daxili işimizdir. Azərbaycanın müxtəlif ölkələrlə hərbi-texniki əməkdaşlığı üçüncü ölkələrə qarşı yönəlməyib, müdafiə gücümüzün artırılmasına xidmət edir. Rusiyanın siyasi dairələrində hələ də bunu anlamaq istəməyənlər varsa, bu onların öz işidir. Biz isə dost və tərəfdaş dövlətlərlə müdafiə və hərbi gücümüzü artıracaq layihələrdə iştirakımızı davam etdirməliyik".

Jalə Rövşən 

TodayPress TV