Vaşinqton görüşünün pərdəarxası: İrana qarşı koalisiya qurulur?

ABŞ Lideri Donald Tramp Ağ Evdə İsrailin baş naziri Benyamin Netanyahu ilə üç saatdan artıq davam edən görüş keçirib. 

Netanyahu müharibədən sonrakı Qəzza zolağını idarə etmək üçün yaradılan "Sülh Şurası"na rəsmi olaraq qoşulub. 

Baxmayaraq ki, daha öncə İsrail bundan imtina etmişdi. 

Bəs bu İsrailin Qəzza siyasətində ciddi dönüşə işarə hesab oluna bilərmi? 

Sözügedən məsələ barədə siyasi analitik Abutalıb Səmədov TodayPress TV-yə danışıb. 

O bildirib ki, Netanyahunun Sülh Şurasında iştirakı zəruridir:

"Sülh Şurası ilkin olaraq Qəzza bölgəsi üçün yaradılıb. Sonradan bu təşəbbüsü digər mövcud və ya yarana biləcək münaqişələrə də aid etmək ideyası ortaya çıxıb və bu, Sülh Şurasının nizamnaməsində öz əksini tapıb. Bu səbəbdən Netanyahunun Sülh Şurasında iştirak etməkdən imtina etməsi mümkün deyil. Sadəcə olaraq, Davosda imzalanma mərasimində Netanyahu iştirak etmədi, ancaq rəsmi şəkildə imtina etməyib. Görünür, o, mərasimi daha təntənəli şəkildə və ya özünün lazım bildiyi şəkildə Ağ Evdə imzalamaq istəyirdi və bu da baş verdi".

Ekspert hesab edir ki,  Netanyahunun Vaşinqtona səfərinin əsas məqsədi İrana qarşı atılacaq addımları müzakirə etmək və ABŞ-ni İrana güzəştlərdən çəkindirmək idi: 

“Çünki İran açıq şəkildə bəyan edib ki, yalnız nüvə proqramını müzakirə edəcək; ballistik raketlər və proksi qüvvələrlə bağlı məsələləri müzakirə etməyəcəyini bildirib. Bu, təbii olaraq Netanyahunu qətiyyən razı salmır”.  

Onun sözlərinə görə, Vaşinqtona səfərdən sonra müəyyən razılaşmaların əldə olunduğu güman edilir. Bu isə ABŞ ilə İran arasında razılıq imkanlarını bir qədər də azaldıb:

“Onsuz da İranın mövqeyi ABŞ-ni qətiyyən qane etmirdi və razılaşma ehtimalı çox az idi. Netanyahunun səfərindən sonra bu inam daha da zəifləyib və yaxın günlərdə ABŞ-nin İsraillə birlikdə İrana zərbələr endirmək qərarına gələ biləcəyi istisna edilmir”. 

A.Səmədov son olaraq əlavə edib ki,  İsrailin Qəzza siyasətində ciddi dönüş yoxdur və ABŞ ilə görüşdə əsas məqsəd Trampın əvvəlcədən razılaşdırılmış mövqeyində qalmasını təmin etmək olub.  

Jalə Rövşən

TodayPress TV