Trampın İran müharibəsi amerikalıları dalana dirədi: Cibində siçan oynayan seçici Trampı seçəcək?

ABŞ-də siyasi və iqtisadi əhval-ruhiyyə ara seçkilər ərəfəsində ciddi şəkildə dəyişib.

TodayPress TV xəbər verir ki, bu barədə "Reuters" "Ipsos"un apardığı sorğuya əsasən məlumat yayıb.

Toplanan məlumatlar yalnız benzinin qiymət artımı ətrafında yaranan narazılığı deyil, həm də bu narazılığın birbaşa siyasi məsuliyyətlə əlaqələndirilməsini ortaya qoyur.

Sorğunun ən diqqətçəkən nəticələrindən biri seçicilərin böyük hissəsinin – təxminən 77%-nin – yanacaq qiymətlərinin artımına görə Prezident Donald Trampı məsul hesab etməsidir. Bu göstərici yalnız Demokrat seçicilər arasında deyil, Respublikaçılar və müstəqil seçicilər arasında da yüksəkdir. Məsələn, Respublikaçıların 55%-i, müstəqillərin isə 82%-i bu artımı prezidentlə əlaqələndirir. Bu fakt göstərir ki, məsələ artıq sırf partiya loyallığı çərçivəsindən çıxaraq daha geniş ictimai narazılıq formalaşdırıb.

İqtisadi faktorlar burada əsas rol oynayır. Benzinin qiymətinin təxminən 4 dollara yüksəlməsi və ümumi inflyasiya narahatlıqlarının 82% səviyyəsində olması, ailə büdcəsinə birbaşa təsir edən problemlərin siyasi qiymətləndirməni formalaşdırdığını göstərir. Respondentlərin 70%-nin iqtisadiyyatın “inkişaf etdiyi” fikri ilə razılaşmaması da hazırkı administrasiyanın iqtisadi mesajlarının ictimai qəbulunda ciddi boşluq olduğunu ortaya qoyur.

Sorğu həm də göstərir ki, iqtisadi məsələlər artıq xarici siyasət hadisələri ilə, xüsusilə İranla bağlı hərbi gərginliklə birbaşa əlaqələndirilir. Respondentlərin bir hissəsi bu münaqişəni yanacaq qiymətlərinin artmasının səbəbi kimi görür və bu da prezidentin siyasi məsuliyyətini daha da gücləndirir. Nəticədə, seçicilərin 58%-i Trampın İran siyasətini dəstəkləyən namizədlərə səs verməyə daha az meylli olduğunu bildirir ki, bu da seçki davranışında dəyişiklik siqnalıdır.

Digər mühüm məqam Respublikaçıların iqtisadi üstünlüyünün zəifləməsidir. Əgər əvvəl partiyanın iqtisadi idarəetməyə etimadı 14 xal üstünlük təşkil edirdisə, hazırda bu fərq 1 xala enib. Bu, qısa müddət ərzində ictimai rəyin nə qədər sürətlə dəyişə bildiyini göstərir.

Nəticə etibarilə, sorğu ABŞ-də seçicilərin iqtisadi problemləri birbaşa siyasi rəhbərliklə əlaqələndirdiyini və bu amilin ara seçkilərin nəticələrinə ciddi təsir göstərə biləcəyini ortaya qoyur. Benzin qiymətləri, inflyasiya və xarici siyasət qərarları artıq ayrı-ayrı mövzular deyil, bir-biri ilə bağlı siyasi məsuliyyət zəncirinə çevrilmiş vəziyyətdədir.

Jalə Rövşən

TodayPress TV