Qazaxıstanda keçiriləcək regional ekoloji sammitin əhəmiyyəti

2026-cı il 22–24 aprel tarixlərində Qazaxıstanın paytaxtı Astana şəhərində ilk dəfə olaraq Regional Ekoloji Sammit keçiriləcək. 

TodayPress TV xəbər verir ki, bu mühüm beynəlxalq tədbir dövlət başçılarını, aparıcı ekspertləri və nüfuzlu beynəlxalq təşkilatların rəhbərlərini bir araya gətirəcək.    

Bu  sammit Qlobal miqyasda aktuallığı sürətlə artan ekoloji və su ehtiyatları problemlərinin müzakirəsi üçün vahid platforma rolunu oynayacaq.

Sammitin əsas məqsədi ekoloji çağırışlara qarşı ortaq və praktik həll mexanizmlərinin hazırlanması, eləcə də dövlətlərarası əməkdaşlığın gücləndirilməsidir.   

Tədbirdə Mərkəzi Asiya ölkələri ilə yanaşı, Avropa İttifaqı, Şanxay Əməkdaşlıq Təşkilatı və Yaxın Şərq regionundan təxminən 1500 iştirakçının iştirakı gözlənilir.

Bu geniş coğrafi təmsilçilik Sammitin beynəlxalq əhəmiyyətini bir daha nümayiş etdirir.

Müzakirələr səkkiz əsas istiqaməti əhatə edəcək.  

Bunlara ekoloji risklərə uyğunlaşma və iqtisadi dayanıqlıq, ərzaq təhlükəsizliyi və regional ekosistemlərin qorunması, təbii resursların davamlı idarə olunması, atmosfer çirklənməsi və tullantıların idarə edilməsi, ekoloji ambisiyalara nail olma mexanizmləri, ədalətli və inklüziv keçid, ekoloji və rəqəmsal bacarıqların inkişafı, həmçinin iqlim keçidinin dəstəklənməsi daxildir.

Sammitin ən mühüm nəticələrindən biri Mərkəzi Asiya dövlət başçılarının  ekoloji deklarasiyasının birgə qəbul edilməsi olacaq.

Bu sənəd regionda ekoloji siyasətin gələcək konturlarını müəyyənləşdirən strateji yol xəritəsi rolunu oynaya bilər.

Qeyd etmək lazımdır ki, Regional Ekoloji Sammit təşəbbüsü BMT ilə tərəfdaşlıq çərçivəsində Qazaxıstan Respublikasının Prezidenti Kasım-Jomart Tokayev tərəfindən 2023-cü ildə BMT Baş Assambleyasının 78-ci sessiyasında irəli sürülüb.    

Bu fakt Qazaxıstanın qlobal ekoloji gündəmdə artan rolunu və məsuliyyətini aydın şəkildə ortaya qoyur.

Nəticə etibarilə, Regional Ekoloji Sammit təkcə ekoloji problemlərin müzakirə olunduğu bir platforma deyil, eyni zamanda gələcək nəsillər üçün dayanıqlı və təhlükəsiz mühitin formalaşdırılması yolunda beynəlxalq həmrəyliyin real təzahürüdür.