Lüis Hemiltondan 16 illik antirekord

“Formula-1” yarışları üzrə 7 qat dünya çempionu Lüis Hemilton Las-Veqas Qran-Prisinin təsnifat mərhələsində sonuncu yeri tutub. 

TodayPress TV xəbər verir ki, 40 yaşlı britaniyalı pilot, 2009-cu ildən bəri təsnifatda sonuncu olan ilk “Ferrari” sürücüsüdür.

Təsnifatda birinci yeri Lando Norris (“McLaren”, 1:47.934), ikinci yeri Maks Ferstappen (“Red Bull”, +0.323), üçüncü yeri isə Karlos Sains (“Williams”, +0.362) tutub.

Hemilton ilk seqmentdə 1:57.115 nəticə göstərdiyi üçün növbəti mərhələyə adlaya bilməyib. Bu bütün pilotlar arasında ən zəif nəticə olub.

Sonuncu dəfə “Ferrari” pilotunun təsnifatda axırıncı olması 2009-cu ildə qeydə alınıb. O zaman italiyalı Cankarlo Fizikella Əbu-Dabi Qran-Prisində 1:42.184 nəticə ilə 20-ci olmuşdu.

Hemiltonun komanda yoldaşı Şarl Lekler bu dəfə 9-cu nəticə göstərib. 2009-cu ildə isə Fizikellanın komanda yoldaşı Kimi Raykkönen 11-ci olmuşdu.

Namiq HUN

TodayPress TV