Kayl Uokerdən iddialı açıqlama: “Premyer Liqaya qayıtmalıyıq”

“Börnli”nin müdafiəçisi Kayl Uoker Çempionşipdə çıxışının karyerasında oynadığı mühüm rol barədə danışıb.

TodayPress TV xəbər verir ki, bu barədə “Daily Mail” nəşri məlumat yayıb.

İngiltərəli futbolçu karyerasının ilk illərində “Şeffild Yunayted” və “Kuinz Park Reyncers” klublarının heyətində İngiltərənin ikinci liqasında çıxış edib.

“Çempionşipdə oynamaq karyeramda böyük rol oynadı. Burada çıxış etmək səni təkcə məhdudlaşdırmır, həm də öyrədir. Eyni zamanda, bu liqa insanı reallığa qaytara bilər. Fİts Holl, Şon Derri, Klint Hill və Pedi Kenni kimi təcrübəli futbolçuların əhatəsində idim və soyunub-geyinmə otağında əla atmosfer hökm sürürdü. Məhz orada futbola sevgimi yenidən qazandım. Bu da Premyer Liqaya doğru addım atmağım üçün mənə lazım olan şey idi”, – Uoker bildirib.

Müdafiəçi “Börnli” ilə Premyer Liqanı tərk etmələrinin onda xoşagəlməz hisslər yaratdığını da qeyd edib.

“Börnli” ilə Premyer Liqadan düşməyimiz xoşagəlməz təəssürat yaratdı. Mən vəziyyəti düzəltməyə kömək etmək istəyirəm. Bu, təkcə özüm üçün deyil, yaşananlarla üzləşməli olan azarkeşlər və komandada qalan futbolçular üçün də vacibdir.

Hiss edirəm ki, hər şeyi düzəltməyə borcluyuq. Soyunub-geyinmə otağımızda olan futbolçuların səviyyəsini nəzərə alsaq, Premyer Liqaya qayıtmalıyıq.

Düşünürəm ki, bəzi insanlar hazırda deyildiyi kimi, məndən “mem” yaratmağa çalışacaqlar. Amma sizi əmin edirəm ki, heç kim məni memə çevirə bilməyəcək”, – deyə Uoker əlavə edib.

Namiq HUN