“Mövqedə köklü dəyişiklik olmalıdır” - Fransadan İrana şərt

Fransa İrandan ABŞ ilə danışıqlarda ciddi güzəştlər gözləyir və rəsmi Tehranın Hörmüz boğazında gəmiçiliyə nəzarət etməsinə qarşı çıxır.

TodayPress TV xəbər verir ki, bu barədə Fransanın xarici işlər naziri Jan-Noel Barro BMT Təhlükəsizlik Şurasının iclasında çıxış edərkən bildirib.

"İran hakimiyyəti ciddi güzəştlərə və mövqeyində köklü dəyişikliyə razı olmayana qədər bu böhranın uzunmüddətli həlli mümkün olmayacaq. Bu dəyişiklik İrana öz regional ətrafı ilə sülh şəraitində birgə yaşamağa imkan verməlidir", - deyə Barro qeyd edib.

Fransa diplomatiyasının rəhbəri həmçinin vurğulayıb ki, Hörmüz boğazında gəmiçiliyin bloklanması kökləri ABŞ və İsrail tərəfindən dəqiq müəyyən edilmiş məqsədlər olmadan və beynəlxalq hüququn pozulması ilə başladılan əməliyyatlara dayanan hərbi eskalasiya nəticəsində başlayıb.

Bununla belə, onun fikrincə, hadisələrin bu cür inkişafına görə məsuliyyət İranın üzərinə düşür. Barro bəyan edib ki, Fransa beynəlxalq suları ümumi sərvət hesab edir və blokadalar, keçid icazəsi tələbləri, o cümlədən bu icazəyə görə ödənişlərin alınması vasitəsilə gəmiçiliyə mane olunmasına qarşı çıxır.

Aysel Mətləb

TodayPress TV