"BMW Group" 3 milyonuncu elektrikləşdirilmiş avtomobilini satdı

"BMW Group" mühüm bir mərhələni qeyd edib — şirkət artıq 3 milyon elektrikləşdirilmiş avtomobil (hibrit və tam elektrik modellər) satıb. 

TodayPress TV xəbər verir ki, bu barədə “Jalopnik” yazır.

Yubiley avtomobili — 3-cü seriyadan olan "330e" qoşulan hibrid Münhendəki zavoddan çıxaraq alıcısına təhvil verilib. Bu nailiyyət 2025-ci ilin birinci yarısında həm elektromobillərin, həm də hibridlərin satışında ciddi artımın nəticəsi olub.

"BMW Group"un satışlarının dörddə birindən çoxunu elektrikləşdirilmiş modellər təşkil edir. Ən iri bazar Avropadır — burada satılan ümumi avtomobillərin 40%-dən çoxu elektrikləşdirilmiş modellərdir və bütün satışların 60%-i bu qitəyə düşür.

Şirkət paralel olaraq daha bir uğuru qeyd edib: iyul ayında 1,5 milyonuncu tam elektrikli avtomobil satılıb. Bu "MINI Countryman SE" modeli Leypsiqdə istehsal olunaraq Portuqaliyadakı alıcısına çatdırılıb. "BMW Group"un ümumi satılmış elektrikli avtomobillərini bir sıraya düzsək, onların uzunluğu 6 500 kilometrə — demək olar ki, Münhenlə Nyu-York arasındakı məsafəyə bərabər olardı.

Hazırda "BMW Group"un portfelində "BMW", "MINI" və "Rolls-Royce" markaları altında 15-dən çox tam elektrikli və 10-dan artıq qoşulan hibrid model mövcuddur. Son yeniliklər arasında 700 kilometrdən artıq məsafə qət edə bilən yenilənmiş "BMW iX" də yer alır.

Qiymət Mahir