NƏHƏNGLƏRİN SAVAŞI: PSJ–“BAVARİYA” VƏ “ARSENAL”–“ATLETİKO”

UEFA Çempionlar Liqasının 2025/26 mövsümündə 71-ci buraxılışın yarımfinal mərhələsinin iştirakçıları və oyun cədvəli dəqiqləşib.

Yarımfinal mərhələsi 28 aprel tarixində "Pari Sen-Jermen" – "Bavariya" qarşılaşması ilə start götürəcək.

“BAVARİYA” TARİXİ BAXIMDAN ÜSTÜN OLSA DA,

Son illərdə Avropa turnirlərində tez-tez qarşılaşan bu komandalar artıq klassik rəqabətə çevrilib. Onların arasında keçirilən 15 oyunda heç-heçənin qeydə alınmaması diqqət çəkən əsas statistik məqamdır. Ümumilikdə "Bavariya" 9 qələbə ilə üstünlük təşkil edir. Bu cütlükdə oyunların çoxu “açıq futbol” və yüksək tempdə keçir və nəticələr adətən kiçik detallarla müəyyən olunur. Hazırkı qiymətləndirmələrə görə, Almaniya təmsilçisi 55/45 nisbəti ilə bir qədər üstün sayılır.

ÇL-DƏ İNTRİQA PİK HƏDDƏ 

Digər yarımfinal cütündə isə “Atletiko Madrid” və “Arsenal” üz-üzə gələcək. İlk oyun 29 aprel tarixində Madriddə baş tutacaq.

Bu komandalar cari mövsümün ümumi mərhələsində artıq qarşılaşıblar və həmin görüşdə “Arsenal”ın 4:0 hesablı inamlı qələbəsi qeydə alınıb. Bu nəticə oyun üslubları arasındakı fərqi açıq şəkildə göstərir: “Atletiko” daha çox müdafiəyə üstünlük verir, “Arsenal” isə sürətli hücumlarla rəqibə təzyiq yaradır.

Statistik qiymətləndirmələrə əsasən, “Arsenal” bu cütün favoriti hesab olunur və şanslar 60/40 nisbətində London klubunun xeyrinə qiymətləndirilir. Bununla belə, Madrid təmsilçisinin oyunu “bağlamağı” bacardığı halda sürpriz nəticə istisna edilmir.

Namiq HUN