Mbappe: Qaydaları pozan futbolçu turnirdən kənar qalmalıdır

Fransa millisinin və “Real Madrid” klubunun hücumçusu Kilian Mbappe UEFA-ya müraciət edərək, Çempionlar Liqasının pley-off mərhələsində “Benfika” ilə keçirilmiş qarşılaşmada baş verən insident barədə danışıb.

TodayPress TV Marca nəşrinə istinadən xəbər verir ki, “Benfika”- “Real Madrid” (0:1) oyunu 9 dəqiqə dayandırılıb, çünki qolu vuran Vinisius Junior baş hakim Fransua Leteksiyeyə yerli komandanın futbolçusu Canluka Prestianni tərəfindən rasist davranışın edildiyini bildirib.

“Uşaqlar bizi izləyir və biz düzgün nümunə göstərməliyik. Belə hallar qarşısında göz yummaq olmaz. Tanıdığım çox sayda hörmətli portuqaliyalı dostlarım var, amma bu cür vəziyyətlər açıq şəkildə müzakirə olunmalıdır. Azarkeşlər bizə etiraz edirdi, çünki baş verənin əsl səbəbini bilmirdilər.

Mən “Benfika” klubuna və məşqçisinə qarşı heç bir irad bildirmirəm. Onu yüksək səviyyəli mütəxəssis hesab edirəm, klub isə Avropanın ən güclü komandalarından biridir. Lakin qayda pozan futbolçunun artıq Çempionlar Liqasında çıxış etmək mənəvi haqqı yoxdur. Ümid edirəm ki, UEFA rəhbərliyi ciddi tədbir görəcək.

Prestianni üzr istədi? Sadəcə onun reaksiyasına baxmaq kifayətdir. Həqiqi üzr fərqli olardı. Gənclik bəhanə ola bilməz. Komanda kollektiv şəkildə meydandan çıxmağı qərara aldı, lakin sonra oyun davam etdi.

Hər hansı bir oxşar hadisə sizə də təsir etsəydi, necə reaksiya verərdiniz? Çempionlar Liqasındakı qələbə vacibdir, amma idmandan üstün prioritetlər də var. Düzgün mövqe göstərmək lazımdır ki, gənclər düzgün nümunə alsınlar”, - deyə Mbappe bildirib.

Qeyd edək ki, Mbappe Prestianninin rasist hərəkətlərinə görə matç zamanı bir neçə dəfə etirazını bildirib.

Namiq HUN

TodayPress TV