"Trampın dövründə Kubanı ciddi dəyişikliklər gözləyir” – Politoloq

Amerika lideri Donald Tramp Ağ Evdə İrlandiyanın Baş naziri Maykl Martinlə görüşdən əvvəl jurnalistlərin suallarını cavablandırarkən bildirib ki, ABŞ tezliklə Kubaya qarşı tədbir görmək niyyətindədir:

“Kuba çox pis vəziyyətdədir. Onlar ABŞ Dövlət Katibi Marko Rubio ilə əlaqə saxlayırlar. Biz tezliklə Kuba ilə bağlı bir şey edəcəyik, diqqətimiz buna yönəlib”.

Maraqlıdır, Kubanı nə gözləyir?

Mövzu ilə bağlı politoliq Abutalıb Səmədov TodayPress TV-yə danışarkən vurğulayıb ki, ABŞ-nin Kubada hakimiyyət dəyişikliyi planı açıq müdaxilə modelinə çevrilir.

Onun sözlərinə görə, Tramp Kubada hakimiyyəti dəyişmək və Prezident Migel Dias-Kaneli hakimiyyətdən devirmək məqsədini qarşısına qoyub. 

“O, həmçinin açıq şəkildə bəyan edir ki, ABŞ-nin istəmədiyi şəxs hər hansı bir dövlətin başında ola bilməz. Hazırda danışıqlar davam edir, lakin Kubada vəziyyət kifayət qədər ağırdır və demək olar ki, mühasirə şəraitindədir. Neft, elektrik enerjisi və ərzaqla bağlı ciddi problemlər yaranıb. Böyük ehtimalla, Kuba Prezidenti hərbi müdaxilə olmadan, könüllü şəkildə hakimiyyətdən uzaqlaşacaq və ABŞ-ni qane edən bir namizəd ölkə rəhbərliyinə gətiriləcək”, - deyə analitik izah edib.  

Ekspert qeyd edib ki, bu günə qədər böyük dövlətlərin gizli şəkildə, müəyyən vasitələr və təşkilatların maliyyə dəstəyi ilə həyata keçirdikləri hakimiyyət dəyişikliklərini indi Tramp hər kəsin gözü qarşısında zorakılıqla icra etməyə başlayıb.

“Bu çox təhlükəli bir tendensiyadır və digər dövlətlər, ilk növbədə Rusiya bu nümunəni tətbiq etməyə cəhd göstərə bilər”.  

Siyasi şərhçi Kubanın sosialist xarakterinin dəyişib-dəyişməyəcəyi məsələsinə toxunaraq bildirib ki, hələlik buna toxunulmayacaq:

“Əhali sosializmə müəyyən qədər öyrəşib. Lakin tədricən dəyişikliklər baş verəcək və Kubanı ABŞ-nin arzuladığı dövlətə çevirmək planı işə düşəcək”.

A.Səmədov xatırladıb ki, uzun illərdir ABŞ liderləri Kubadan narazılıq edir və hakimiyyəti dəyişmək üçün müəyyən cəhdlər göstərirdilər, lakin bu dərəcədə açıq müdaxilə olmayıb. 

“Tramp göstərdi ki, ən effektiv müdaxilə forması müstəqil dövlətdə hakimiyyəti kobud şəkildə devirmək yoludur. Görünür, bu praktika Trampın hakimiyyəti dövründə bir çox dövlətlərə tətbiq olunacaq. Kubanı ciddi dəyişikliklər gözləyir və bu, təkcə prezidentin getməsi ilə məhdudlaşmayacaq”, - deyə politoloq fikrini tamamlayıb.

Aysel Mətləb

TodayPress TV