Şimali Koreya FƏALLAŞDI: Raketlər hərbçilərə qarşı!

Şimali Koreya ölkənin şərq sahili istiqamətində 10-dan çox ballistik raket buraxıb. Bu, ABŞ-nin Cənubi Koreyada təxminən 28 min 500 hərbçisi və qırıcı təyyarələrinin yerləşdirildiyi vaxta təsadüf edib.

Şimali Koreya isə bu cür birgə hərbi təlimləri tez-tez “ölkəyə hücum üçün hazırlıq” kimi qiymətləndirir və sərt reaksiya verir.

Sual yaranır, Şimali Koreya ABŞ və Cənubi Koreyanın hərbi təlimlərini özünə qarşı təhdid kimi qiymətləndirməkdə haqlıdırmı?

Sözügedən mövzunu politoloq Əli Mustafa TodayPress TV-yə şərh edib.

Ekspert bildirib ki, Şimali Koreyanın nüvə dövləti olduğunu nəzərə almaq lazımdır:

"Xeyr, Şimali Koreya nüvə dövləti olduğu üçün Cənubi Koreyanın və ya ABŞ-nin ona hücum etməsini düşünmək doğru deyil: Bildiyim qədər, onların belə bir niyyəti yoxdur. Əksinə, ABŞ və Cənubi Koreya Şimali Koreyadan gələn təhdidlərdən qorunmaq üçün orada silahlı qüvvələr yerləşdirir, hava hücumundan müdafiə sistemləri quraşdırır və digər tədbirlər görür".

Analitik hesab edir ki, hazırkı eskalasiyanın müəllifi Şimali Koreyadır:

"Hətta bu günlərdə Şimali Koreya Yaponiya istiqamətinə də ballistik raket atıb. O, demək olar ki, həm Yaponiyanı, həm də Cənubi Koreyanı təzyiq altında saxlamaqla, əslində ABŞ-nin digər bölgələrdə, xüsusən Yaxın Şərqdəki hərbi fəallığına mane olmağa çalışır. Mənim fikrimcə, burada məqsəd İranı qorumaqdır".

Politoloq həmçinin vurğulayıb ki, ABŞ İrana qarşı hərbi hazırlıq görür:

"Bildiyim qədər, ABŞ Cənubi Koreyadan müəyyən silah-sursat, o cümlədən Patriot hava hücumundan müdafiə sistemlərini çıxararaq İran istiqamətinə göndərir. Bunun məqsədi körfəz ölkələrini qorumaq və İsraili müdafiə etməkdir. Belə bir şəraitdə Şimali Koreya da fəallaşaraq, sanki ABŞ-nin İrana qarşı təzyiqlərinin qarşısını almağa çalışır. Yəni onun məqsədi, Amerikanın daha çox güc toplayaraq İrana qarşı hərbi əməliyyat aparmasının qarşısını almaqdır".

Ekspert diqqətə çatdırıb ki, Hind-Sakit Okean regionunda gərginliyin mövcudluğu danılmazdır. Çin və Şimali Koreya ABŞ-nin bölgədəki müttəfiqləri ilə qarşı-qarşıya gələ bilər. Bu baxımdan tərəflərin bir-birinə etimad etməməsi və bir-birlərindən təhlükə gözləməsi normaldır.

“Amma indiki vəziyyətdə düşünürəm ki, eskalasiyanın əsas müəllifi Şimali Koreyadır. O, açıq şəkildə İranı dəstəkləyəcəyini, hətta İsrailə qarşı nüvə silahından istifadə edə biləcəyini bildirib. Bu baxımdan bölgədə baş verənlər daha çox ABŞ-ni bu regionda saxlamaq və onun İrana qarşı hərbi qüvvə cəmləməsinin qarşısını almaq məqsədi daşıyır”, - analitik fikrini tamamlayıb.

Jalə Rövşən

TodayPress TV